| ||||||
霍家大事鋪張為第三代長子霍啟剛迎娶國寶郭晶晶，在中港兩地連續舉行三場盛大的婚宴，豪花千萬，成為近年最豪華的世紀婚禮。但原來風光背後，霍家對女家相當刻薄，貴為香港名門望族，俾親家禮金只有五百萬人民幣，邀請晶爸晶媽來港出席婚禮，只安排他們坐經濟位客機，入住千五元一晚富豪酒店，而霍啟剛同郭晶晶自己就住五萬五千元君悅酒店總統套房，甚至拒絕女家要在故鄉保定舉行多一場婚宴的要求。難怪連日來，郭晶晶父母一直面有難色，沒有半點辦喜事的喜悅。 黑面親家 晶媽晶爸受到男家冷待，週日晚飲完喜酒，口黑面黑返回男家為他們安排入住的富豪酒店。 豪門夜宴 拍拖八年，霍啟剛終於迎娶郭晶晶，由於霍家家世顯赫，分別在政界、商界及體育界都有頭有面，加上會有多位城中超級富豪及政界人物出席，所以婚禮一定要辦得風風光光，而身為霍家揸數人的霍震寰，當然要幫阿哥霍震霆計數，批出千萬在香港及南沙舉行連續三場世紀婚禮的 開支。表面睇，這次霍家娶新抱極盡奢華，但原來霍家只是闊佬自己充撐場面，對女家一直諗縮數慳得就慳。據知霍家一口價以五百萬人民幣做禮金，並無加送豪宅作禮物。「嫁女」非「賣女」，錢多錢少晶爸晶媽其實無異議。 逼坐經濟 禮金唔多，就連招待親家來港觀禮，安排亦求求其其，要他們在婚禮前一日（七日）才頻撲由北京到港，但最意想不到是，霍家為慳少少錢，竟安排他們乘坐經濟客位航機，住宿亦只是每晚房租千五元的富豪酒店普通雙人房，至於一對新人在婚禮舉行這一星期，則入住君悅酒店總統套房，每晚房租五萬五千元。「晶晶父母今次嚟香港嘅嘢，全部由男家安排，佢哋都係去到機場先知原來要逼經濟艙，平時佢哋去旅行，晶晶都會買商務位俾佢哋，等佢哋舒服啲，冇諗過個女婿咁唔識做，但晶晶媽最介意係唔可以同個女住埋同一間酒店，結婚前一晚都冇得陪住個女！」郭晶晶身邊人說。 三日使千萬 全城矚目的「剛晶大婚」，擺足四日三夜，由於有不少政要高官，同超級富豪出席，所以不能失禮，埋單超過一千萬。 8/11霍家大宅註冊場地佈置70萬房車接送15萬自助餐連酒水50萬南沙婚宴酒席（60圍）120萬場地佈置80萬賓客住宿接送40萬煙花匯演150萬接待傳媒10萬香港會展婚宴酒席（150圍）300萬場地佈置100萬賓客接送20萬雜項結婚蛋糕（3個）10萬回禮禮物（普洱茶一罐、糖霜曲奇）50萬保安60萬利是60萬兄弟姊妹團服裝、化妝20萬共：1,155萬 親家無偈傾 上週四（十一月八日）行禮當日，霍家只安排了十六座位旅遊巴，接載晶晶父母同一眾姊妹團一齊到霍家大宅，並禁止將車駛入屋內，要他們在門口落車，情況狼狽。據現場所見，兩親家整日甚少交談，晶晶父母經常自己企埋一邊，到新娘子拖住父親行禮，晶晶母親亦未有表現出不捨心情，沒有感觸落淚，場面毫不 感人。之後在南沙及香港會展舉行的晚宴，晶晶父母被安排坐副主家席，正主家席反而留俾高官政要人物，但最令晶晶父親不滿，是他原本預備上台講出嫁女心情，但男家以時間唔夠為由拒絕，最後只有老爺霍震霆可以上台講話，在香港的晚宴，郭爸爸繼續「被收聲」，反而九唔搭八的董建華有份上台致辭。完成婚禮當晚，晶晶父母第一時間返回酒店休息，但記者見他們完全沒有喜悅神色，似乎對婚禮安排極為不滿。 唔俾鄉下襬酒 「其實晶晶父母最唔滿意，係男家一句都冇問過佢哋意見，後來女家提出想喺鄉下保定搞一場婚禮，但霍家企硬唔肯再俾錢，淨係叫佢哋安排親戚去南沙飲喜酒，但男家睇見個名單又話唔夠位坐，招呼唔到咁多人，搞到晶爸好唔開心，同個女投訴，晶晶夾喺中間，唯有求Kennth（霍啟剛）安撫佢爸爸，最後一人行一步，答應十八號返保定擺番十圍，同晶晶啲親戚食餐飯當交代，但霍老爺同奶奶朱玲玲唔會到，搞到郭家覺得好無面！」郭晶晶身邊人說。只顧霍家面子，對親家愛理不理的霍老爺，更一口否定十八日是女家婚宴，「佢（晶晶）應該嫁咗過嚟（香港），我哋都擺咗幾場，都冇得走回頭路，星期日（十一日）嗰晚已經任務完成咗。」 首飾戴完要還 除了對親家刻薄，霍家對這位國寶級新抱亦未見有特別厚待，像晶晶今次連踩三場婚宴，五套婚紗晚裝不斷循環再著，在紐約購買的婚紗，前後總共著了四次，除了在三場婚宴上著過外，影結婚相都是同一條裙，其餘的晚裝裙起碼著了兩次或以上，與其他豪門新抱徐子淇及李嘉欣相比，可以場場唔同靚衫，果然好「慳」。靚衫都唔多套，晶晶所佩戴的四套鑽飾，亦非過千萬超級名貴珠寶，根據一些專業珠寶鑑證人士表示，新娘子身上大部分的首飾，無論顏色、形狀同體積，只屬中價貨，每件價錢由百幾至幾百萬不等，據知當中有些更是霍家的家產，戴完之後要還，不能據為己有。 環保行頭 霍啟剛與郭晶晶的三場「中港婚禮」，其間晶晶一共換上五套禮服及四套首飾，但大部分在早前影婚紗相時已經出現過，循環再用，非常環保！ 著4次 今次大婚，晶晶只購入一套婚紗，早前便穿上在霍家大宅影婚紗相，加埋簽紙註冊、南沙同香港兩日晚宴，一共著咗4次。 著3次 Deep V晚裝是2011年冬季系列過氣款式，晶晶早前著住同霍啟剛在英國影婚紗相。 著2次 在南沙的酒會同會展婚宴的尾聲，晶晶翻炒穿上淺藍色晚裝。 著2次 晶晶在酒店花園欣賞煙花時穿上的白色露肩裙，在北京水立方影的婚紗相中已經出現過，跟葉蒨文在今年7月，為演唱會舉行記招時也著過同款裙。 著1次 晶晶在南沙晚宴中穿的裙褂，是婚禮中唯一一套新衫，只著過一次。 豪門禮金 70年代，朱玲玲下嫁霍震霆，當年男家俾400萬禮金，成為一時佳話，當年這金額，夠買幾幢豪宅，事隔20年，通貨膨脹，李嘉欣、徐子淇等嫁入豪門，禮金全部多兩個零，億億聲起跳。 朱玲玲 400萬禮金 霍英東長子霍震霆迎娶港姐冠軍朱玲玲，當年，霍家在尖沙咀美麗華酒店筵開360席，擺足三日，禮金更高達400萬，當年足夠買起一幢樓。 林青霞 780萬禮金 林青霞下嫁富商邢李『火原』，在美國舉行豪華婚宴，男家出手闊綽，有傳當時女家收到100萬美金禮金（即約780萬港元），並有豪宅 揸手。 徐子淇 1億禮金 恆基二少李家誠迎娶徐子淇，二人在澳洲舉行世紀婚禮，花費近七億，有傳徐子淇除了收取1億禮金，四叔更送上價值五千萬的富匯豪庭俾新抱仔。 李嘉欣 1億禮金 李嘉欣下嫁中建企業集團主席許世勳兒子許晉亨，婚禮在許家的石澳大宅舉行，當時有傳許、李兩家曾為禮金鬧不和，最終許家肯妥協俾出1億禮金。 政商拱照 霍家影響力無遠弗屆，去飲喜酒何止香港三代特首，還有操縱香港經濟命脈的地產商及老牌家族，有如影響力龍虎榜，邊位自認富豪又無被邀請，威極有限。 恆基李家 四叔李兆基再次跟細仔李家誠及新抱徐子淇三人行，但逗留半小時先行鬆人，佢解釋話：「沙聲呀，感冒。」著住Stella McCartney裙的徐子淇見人恩愛，亦不忘曬幸福，「睇到報紙話啟剛愛晶晶一生一世，我問老公會唔會愛我一生一世。」丈夫李家誠即搶答：「當然會啦。」點知徐子淇繼續自爆：「佢話愛我十世，係我逼佢答。」 賭王何家 長實李家 甚少見到長實集團主席李嘉誠出席婚宴飲足全程，今次佢同長子李澤鉅六點十分到達，逗留唔夠十分鐘就閃人，佢邊行邊同記者揮手話：「我趕住第二場，所以要走。」有錢人認真事忙。 新世界鄭家 當年一齊做賭場的彤叔出院無期，幸有跟新郎同屬菁英會的彤叔孫女鄭志雯做代表。她佗住七個月肚，著條香蕉黃的大肚婆晚裝配平底涼鞋，跟鋼鐵大王龐鼎元孫仔老公龐建貽去飲。 | ||||||