ZKIZ Archives


強積金回報好 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20121103/18055601
消費者委員會出版嘅《選擇月刊》十月號有一篇詳細嘅「強積金報告,523隻強積金基金收費及賺蝕全公開」,受廣泛傳媒引述,電台電視報紙講個不停,訪問甚麼教授專家,幾乎全部一致大駡強積金,電台聽眾打去烽煙節目,眾口一詞,駡基金收費高,表現差;對投資知識好缺乏嘅節目主持人及評論員,當然亦人云亦云,踩多幾腳。
左丁山透露自己份強積金自2000年計起,至今跑贏恆生指數少少,上升29%,其實以複式年率計,只係差強人意啫,並非最好,但聽到人人話蝕本,就未免感到奇怪。睇報紙,聽一般非專業評論,好容易受誤導,於是去買本《選擇月刊》睇嚇原文講乜,點知十月號好好賣,賣到斷市,上星期行勻半個中環,搵唔到一本。好彩識得人多,卒之搵到一位相熟報販,同左丁山撲咗一本返嚟。
一睇之後,發覺消委會之2012年強積金基金研究詳細列出各種基金之1、3、5,10年基金表現(已扣除管理費),得到一個年率化回報(每年平均),最差回報當然係一年,過去一年股票表現差勁,買股票除非只揸一隻領匯,揸住一個所謂「投資組合」,蝕多賺少啦。但強積金並非用嚟炒嘅,係長期投資,由二十五歲至六十五歲,共有四十年投資時間,故此回報要睇長期。消委會報告列出十年回報率,咦,大多數係正數啫,以所有基金計,平均每年升水4.84%,最高昇15.32%,最差跌1.47%,以股票基金計,十年回報(每年平均)有5.69%,最低跌1.47%,最高15.32%;以香港股票基金計,十年回報(每年平均)有9.69%,最低6.71%,最高15.32%,直情係好啦。近日有前賓架三人發表言論,主張政府搞債券基金,俾市民投資。其實買一般債券(非ibond)作長期投資肯定跑輸通脹,係年青人退休投資大忌,且看消委會之港元債券基金回報率報告,10年計每年回報平均2.17%,最低1.81%,最高2.38%,與香港股票基金之回報相差甚遠。債券基金只宜年近六十歲之人作保本用,年青人為退休著想,一定要長期持有股票基金!
PermaLink: https://articles.zkiz.com/?id=39487

Next Page

ZKIZ Archives @ 2019