ZKIZ Archives


殼王派錢 李克勤200萬返TVB


2012-10-18  NM




「四大」之一的環球唱片,雖然與無綫未完全修好,但雙方關係自殼王入主後,已有所緩和,近日李克勤更落實替無綫台慶遊戲節目《一百萬可能》(暫名)做主持。

為拉攏克勤再為無綫效力,殼王陳國強親自出面,打盡人情牌外,還開出對無綫是空前高價,十萬元一集請克勤回歸,派錢一樣。千萬買版權

今年初,無綫一度與四大唱片破冰,但余詠珊上場擔任非戲劇製作總監後,又再因簽版權紙與四大再起爭端,四大歌手繼續絕跡無綫,無綫契仔李克勤,同樣唔見影。

直至近日,無綫為加強綜藝節目陣容及提高競爭力,斥資千萬買下全球熱爆的NBC電視台遊戲節目《Minute To Win It》版權,製作全新遊戲節目《一百萬可能》(暫名),準備於台慶月推出,並鎖定由福將李克勤擔任主持。

「以前幾乎隔個星期就見克勤上無綫節目,就算內地有商演,佢都係先就咗無綫再考慮其他,雙方關係就等同自己人。呢三年佢唔使上無綫,反而可以不停去內地做騷,賺埋唔少,早排佢上咗內地收視好高嘅《聲動亞洲》,打埋中國北面市場,啲騷更加多到做唔切!所以搵克勤返無綫做主持,都唔係咁易!」知情者說。

傾三次搞掂

明知余詠珊牙齒印多,為免有閃失,殼王陳國強於是親自出馬。「殼王同克勤本來就好老友,經常會約埋聚吓,但平時都唔講工作,今次無綫高價買咗個遊戲節目版權,殼王一開始就鎖定搵克勤做,佢覺得克勤有觀眾緣,做主持又生鬼,所以完全無考慮其他人!」近兩個月,殼王密密約克勤傾合作,又請他一家出海,大打友情牌。「克勤對無綫特別有感情,殼王開到口,答應成數已經好高,加上無綫俾晒呢個遊戲啲片克勤睇,睇過嘅人都話呢個節目實爆,克勤都好有信心!同殼王傾咗三次,已經搞掂。啲手尾就交俾余詠珊同節目監製接手,為咗就克勤時間,有次余詠珊一朝早七點,去陪克勤食早餐,明知殼王志在必得,余詠珊都唔敢有小動作。」知情者說。

一集收十萬

○五年為無綫主持《殘酷一叮》,當年克勤的主持價是六千元一集,今次殼王大手筆,開出十萬一集。「以前主持《殘酷一叮》係歌星約,克勤已經係合約歌星最高薪一個,今次殼王俾到十萬元一集,遷就佢啲期錄影,十足誠意!」知情者說。據了解,克勤會在十一月十九日台慶當日,現身節目公布詳情,四大唱片跟無綫關係,大有機會因克勤而進一步緩和。

老細出馬

有「無綫契仔」之稱的李克勤,08年已經攞過服務廿年金牌,即使在事業低潮期,無綫仍安排他做《勁歌金曲》主持,保住人氣;02年奪得《十大勁歌頒獎禮》最受歡迎男歌星後,克勤幾乎隔星期便上無綫節目,05年做《殘酷一叮》主持,亦一度掀起熱潮,雙方關係深厚,直至09年發生「四大唱片」與無綫版稅風波,克勤開始絕跡無綫,直至殼王陳國強入主後,私下多次邀請克勤上節目,去年《十大勁歌頒獎禮》,他被邀任頒獎嘉賓,頒獎給「最受歡迎女歌星」容祖兒。

熱爆全球

《Minute To Win It》是美國NBC電視台人氣節目,由10年9月開始首播,在全球多個國家如英國、澳洲、法國、德國等都有播放。

遊戲要求參賽者用日常家庭用品完成一些動作,例如60秒內「抆」晒一盒紙巾,將20個高爾夫球疊高等。成功完成即可過關,得到1000美金並晉級挑戰下一個項目。最高累積獎金是100萬美金,參賽者在成功過到第一、五、八同第九關時,都可以選擇放棄晉級拎走獎金。每位參賽者有三次失敗機會,如果都未能成功完成動作,就要被淘汰。

PermaLink: https://articles.zkiz.com/?id=38816

Next Page

ZKIZ Archives @ 2019