智取大市：中央要貨唔要錢
1 :
GS(14)@2018-03-19 04:47:41當大家聚焦喺貿易戰，其實市場上有唔少利好消息出現。之前農行（1288）配股單嘢，1,000億人民幣嘅貨，由匯金、煙草公司加埋新華保險自己食晒，完全唔使流出市面，一來證明國家隊、中資國企要貨唔要錢嘅態度。記唔記得今年初中證監話要搞H股全流通試點？增加股票供應嘅消息，若然隊冧個市會背上政治風險，顯示中央當時對市場頗有信心。今次農行「貨落強者」，同樣釋放咗利好訊息。大藍籌嘅周線圖以至日線圖，正在轉強，即管睇吓整固浪係咪就咁完結。喺內地，市場競爭環境唔同咗，同一行業裏面，龍頭優劣差距亦擴闊，內險股屬一例。國壽（2628）首兩個月保費收入按年跌18.59%，去到1,546億人民幣；中國太平（966）同期人壽保費收入亦跌7.3%。至於平安人壽嘅保費收入升20.5%，至1,469.8億人民幣，太保（2601）升21.1%。平保首兩個月數據之中，美中不足係個人壽險新業務保費489.28億元，按年減少12.56%。內險股人壽保費收入有人增長、有人倒退，強者自然可以爭大啲個餅，平保（2318）同太保股價較強，合理不過。平保下星期二公佈業績，有可能成為股價催化劑。晉佳
http://fb.com/advanceguy1本欄逢周一、三、五刊出
來源:
https://hk.finance.appledaily.co ... e/20180316/20333539