📖 ZKIZ Archives

遷往新加坡 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20120611/16413883

對冲基金經理 N約咗左丁山食午飯，點知碰啱股市大跌，出現甚麼「死亡交叉」，基金 N成日望住電腦，忙中打電話嚟取消午飯之約，話等個市定番啲先至再約過。無所謂啫，每逢大上大落之日，就係對冲基金搵食之時，千祈唔好阻人發達。基金 N本來已經半退休，點知佢多年前嘅舊老闆自從賣咗自己創辦嘅基金，收咗幾億美元之後，嘆世界唔夠幾年，覺得生活太悶，於是重出江湖，自瑞士飛嚟香港，捉住 基金 N幫手，又試玩過，用自己資金試吓水溫先。佢地唔係好似歐洲股神安東尼波頓咁，迷信中國民企股嘅，老闆冇波頓咁大名氣，平時刻意低調，不接受報紙訪問，即 使他日投資失利，都唔會似波頓咁樣俾人講。
點知道仍然有食神，私人銀行家去東南亞巡視業務，在新加坡渡假四天之後，返到香港，冇約人食飯，竟然打 電話嚟問左丁山：「去文華好唔好？」當然好啦，平時賓架 C周圍飛，難得一見嘅嗎。問佢生意如何，佢話前年好好，舊年亦唔曳，但今年金融市場忽然大升、忽然大跌，睇唔中就容易輸錢，人客小心好多，故此生意冇咁 好，但最令佢擔心嘅，唔係市場狀況而係雷曼後遺症，即是矯枉必須過正，證監會與金管局訂立嘅金融產品銷售多咗好多新規矩，有大客新開戶，試吓功夫仔先，用 五十萬美元玩一玩，但新規矩講明，定存一百萬美元以下嘅新客仔買產品，須錄影（ video-taping）為證，有時搞好耐，新客戶（其實係極有經驗投資者）大為不滿，講俾賓架 C聽：「新加坡無此規矩！」至於錄音咯喎，更加係一路錄音，客戶一路睇 iPhone或者 iPad啦。

長此以往，賓架 C好驚私人銀行生意去晒新加坡，彼邦甲級商廈林立，要十萬呎有十萬呎，租金相等於 IFC一半，外來人員（ expats）子女入讀國際學校幾容易，加上空氣比較清新，產品銷售規矩比較寬鬆，故此賓架 C一啲手下已經要求離開香港調往新加坡，甚至有歐洲僱員提議將亞洲總部遷出香港往新加坡落戶。咁，咪打擊香港嘅國際金融中心地位？睇吓新政府有甚麼應變方 案啦，外國銀行來香港開業唔係老馮㗎！


PermaLink: https://articles.zkiz.com/?id=34364
Next Page
ZKIZ Archives @ 2019