國策透視：買港股奇特理由
1 :
GS(14)@2017-10-15 16:34:00筆者最近與一位在內地券商負責操盤的朋友傾偈，他表示雖然睇好後市，但已開始減持A股倉位。點解會咁矛盾？因為最驚中央在十九大後失驚冇神，再禁止券商和基金減持，所以寧願先行減磅避險。他寧願將資金轉買港股，如果勢色唔對都可以隨時走人。這種奇特心理在內地券商操盤手好常見，或可解釋為何北水仲源源不絕湧來港股。2015年7月的「暴力救市」，中央當時出咗好多奇招，至今仍影響深遠。其中一招就是勒令券商不准減持，必須強制性買股。另外，全國基金協會亦發表聯署聲明，呼籲「為國救市」，不做減持。雖然不是強制性，但當時內地基金一哥徐翔婉拒參與救市，並唔肯在聲明上簽名，結果在11月就被公安拘捕，之後以「內幕交易」罪名被判監5年半，唔聽話的下場人人可見。上述朋友擔心的是，十九大後高層人事已定，中央可能需要解決國家隊救市遺留的歷史性問題。當時中央動用過萬億元托市，如果要有秩序散貨，避免對市場帶來衝擊，最簡單做法是以行政指令，甚至是以口頭式的「窗口指導」，禁止券商和基金減持，以保持股市穩定。所以他寧願在A股少賺啲，也要預作防範。黃尹華
fb.com/decodepolicy本欄逢周二、四刊出
來源:
http://hk.apple.nextmedia.com/financeestate/art/20171010/20178192