操盤手札記：騰訊將用戶變現
1 :
GS(14)@2017-10-09 03:39:13中外因素夾擊，港股上周五跌穿10天線同20天線，本周一、二試穿50天線後撐返上去。期指結算前夕，恒指升129點，收27642。港股已連升8個月，8月底收27970，就算9月收低於此，亦不失為一次健康調整。若外圍無乜突變，今個升浪應未完，強股如騰訊（700）、平保（2318）等可逢低吸納。外圍方面，最擔心係美國、北韓擦槍走火。上周，特朗普、金正恩又嗌交，你一句「火箭人」，佢一句「老懵懂」，你又一句「痴線佬」；本周，佢話你嘅言論等同宣戰，你話佢咁講荒謬……會唔會演變到開戰？估計特朗普至少等到11月訪華之後，先會將呢個問題擺上枱。港股近在眼前嘅，係挾「三馬」（馬雲、馬化騰、馬明哲）之名、號稱「金融科技第一股」嘅眾安保險（6060）上市。所謂金融科技（Fintech），係指科技帶嚟嘅金融創新，包括運用大數據、雲計算、區塊鏈、人工智能等技術，喺支付、借貸、理財、保險等範疇上應用。本欄上周提到，中國科網巨頭BAT──百度、阿里巴巴、騰訊先後夥拍車廠研發智能車，其實佢哋亦相繼夥拍銀行開發智能金融。連同京東在內嘅BATJ，呢半年嚟，已分別聯同四大銀行──工行（1398）、中行（3988）、建行（939）、農行（1288）發展金融科技。近年銀行搵客面臨樽頸，網企則礙於監管，要夥拍持牌金融機構先可以從事金融業務，造就雙方孖住搵食。3月28日，阿里巴巴、螞蟻金服率先同建行結盟；6月16日就到京東同工行；6月20日輪到百度同農行；6月22日騰訊同中行亦成立「實驗室」，本周再同中銀（2388）合作。BATJ之中，騰訊喺搵客方面佔優，皆因微信WeChat活躍用戶近10億，係中國最受歡迎社交平台。騰訊將龐大用戶「變現」，可以提升盈利能力。除咗孖住中行同中銀，集團上周亦入股中金（3908），逐步變現其技術、流量、數據、跨平台銷售，打造遊戲同廣告以外另一增長引擎。
割柑人本欄逢周四刊出
來源:
http://hk.apple.nextmedia.com/financeestate/art/20170928/20166743