ZKIZ Archives


來回又折返!港股大時代定die時代?

1 : GS(14)@2017-10-09 03:38:13

港股由年初22,000點,以「估你唔到」慢牛姿態升至9月份高位28,248點,直至本周終於有急劇調整。近期過山車走勢,究竟是大時代的前奏?還是升市已經終結的一個die時代?今次由以立投資管理董事總經理林少陽、《蘋果》專欄作家唐牛及魏力,全方位拆解長短線港股部署,係咪入市等爆升?定選擇行埋一邊食花生?睇咗先講。其中,林少陽從基本因素加上圖表分析,認為恒指處於50天線附近,只係一個調整,未影響長遠上升趨勢。林少陽稱,今次港股升市背後有基本因素支持,其中,克強指數已顯示出中國經濟復蘇訊號。除美國以外,環球經濟過往8年處於低增長環境,復蘇有可能持續較長時間,令企業盈利能夠回升,相對物業市場,股票仍偏好的資產類別。至於目前係咪入市時機?林少陽覺得呢一刻入市都OK,但可能會面對調整,調整有多深亦難以預計,但若睇長遠兩三年,現價仍有唔錯價值,因港股未算貴,恒指預測市盈率12.6倍,市賬率1.33倍,屬歷史中位數甚至偏低水平,若睇15、16倍,仍有具意義上升空間,但難以估計到價時間。林少陽認為,現時操作上唔係要走鬼、清倉,投資者可趁調整買啲。旗下基金由防守性股份轉回較進取股份,醫療、科技及商品股長線睇好趨勢未有太大改變。


唐牛:視乎28,588破頂會升得更勁

至於唐牛認為,港股由早前全部炒大股,直至近一兩個月炒中細價股,就算唔係大時代都係小時代。大時代與否取決於28,588點嘅2015年高位,突破該水平樓上冇蟹貨,股民信心會大增,再加上傳媒會鋪天蓋地報道破頂,「到時啲人會蜂擁入市,我相信嗰陣個升浪會爆得更加犀利。」唐牛教路,散戶目前一定要有貨喺手,視乎有多進取,如果認同大市會升,便應儲住貨先,但同時要有心理準備,估錯邊、市況急轉直下要反手走人。至於最睇好是科網股騰訊(700)及手機科技股舜宇(2382)。


魏力:市況弱唔建議撈底住

至於另一《蘋果》專欄作家魏力,從資金流及技術分析觀察,認為市況偏弱,尤其年初至今恒指慣常於50天線有支持,但今次跌至該水平仍未企得穩,「我覺得個市係弱嘅。」其中早前熱炒內房板塊嘅資金明顯走緊,汽車及蘋果概念股仍相當弱,因此認為指數會試低一級,首個關鍵位27,000點,但仍未算好大支持,去到26,000點支持力才較大,但距現價都相當遠。魏力提到,季結當前,唔少股份仍處於高位,加上9月28日至10月8日正值內地超級黃金周,其間港股冇北水支持。魏力表示自己已清八成貨,現階段不建議找股票撈底,「特別係內房同汽車股,近排已經升咗好多,基金要獲利沽貨,幾乎咩位沽都贏。」




來源: http://hk.apple.nextmedia.com/financeestate/art/20170928/20166058
PermaLink: https://articles.zkiz.com/?id=342234

Next Page

ZKIZ Archives @ 2019