ZKIZ Archives


審批阻新人 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20120528/16373335
資深教育記者來電講教科書,佢話每年暑假都係報導消委會指責教科書價格、教育局批評書商壟斷,已經有十幾年,甚感厭倦。講得耐,寫得多,佢發覺書商數目日漸減少,舊人愈來愈少,不見新人入行,於是知道呢行唔係咁易食茶飯,起碼組織團隊寫書,送往教育局審批呢樣嘢,已經令不少人卻步,因為計唔掂數,萬一唔批,便血本無歸,風險極大。如此審批制度,當然有利舊人,有利背景雄厚、資本充足嘅書商,愈舊愈大愈着數。資深記者經多年採訪而了解嘅道理,大富翁施永青一早就識,所以佢從來唔大力反對政府加強監管地產代理政策,佢嘅金句就係:「監管愈多,中原愈壯大。」唔信?以前代理多到數唔晒,大廈看更都可以叫熟人睇樓,自從有咗地產代理考試及發牌制度,地產代理監管局監控代理,可隨時檢控違規代理之後,代理公司逐漸為兩大集團控制,就係中原利嘉閣與美聯香港置業,連到中原創辦人王文彥自己出去搞長安地產、怡居地產,都冇乜氣勢,叫做有幾間舖而已。
監管愈多,市場參與者愈少,此乃不易道理,不過官僚稱之為市場扭曲,市場壟斷,殊不知官僚自己就係市場壟斷之源,官員隻手負責扭曲市場,其中道理好簡單啫,監管規矩愈來愈多,大大推高交易費用,中小企難以應付,賺唔到錢,咪索性離場,俾大企業玩晒囉,好似地產代理業咁,剩番中原美聯兩大集團,試問競爭法於佢地有何傷害?
教育局干預書價多年不果,又話引入電子書,首先撥款五千萬元引誘 NGO開發電子書,但以配對方式進行, NGO要有四百萬先至可以向政府申請四百萬,合共八百萬元用嚟開發電子書,他日賣電子書要以限定價格發售,賺錢毫無把握,如果你係 NGO董事,你制唔制?據左丁山所知,一間機構嘅管理人員已拒絕邀請。「電子學習聯盟」呢個專業團體發現,逾七成五學校無 WiFi上網,只得17%學生一人一電腦,55%學校電腦已安裝超過五年, out晒咯,點搞電子書教學呀?點解教育局唔撥款改善學校電腦設施?唉,已經要撥五億三千萬去搞國民教育,孫公搵到五千萬搞電子書,已算政府俾面佢老人家㗎嘞!
PermaLink: https://articles.zkiz.com/?id=34046

Next Page

ZKIZ Archives @ 2019