知己知彼：iPhone賣得差賴香港？
1 :
GS(14)@2017-08-04 06:36:24蘋果近日交出第三個財季成績表，盈利與收入都有增長，盈利按年增11.9%，收入升7.2%，係近7個季度最高增長。不過，大中華地區收入曾經係蘋果業績嘅亮點，今天卻變成被人抽秤嘅黑點。該區收入按年下滑一成，蘋果CEO Tim Cook解畫，指香港「陀衰家」，拖累整個大中華地區業績。蘋果2015財年第三財季，來自大中華區的收入達到168億美元，但兩年之後，收入跌到得80億美元，都唔夠當時嘅一半。不過關香港咩事？上季蘋果出業績，大中華地區收入都係差，Tim Cook都話係香港累街坊，因為內地人減少來港旅遊同消費，今季又話香港累事。雖然呢一兩年人民幣轉弱，的確對銷售有影響，不過唔可以賴晒呢個因素。點解內地人對iPhone熱情退卻？原因有三。首先，大家唔好再停留內地人個個都用小米嘅時間，內地手機品牌近年開始進攻高端市場，大大提升智能手機質素及外型。iPhone失寵，華為、OPPO、vivo跑出。就以呢三間最新型號手機以例，全部強調手機鏡頭質素。HUAWEI P9配備著名德國鏡頭廠Leica生產嘅鏡頭；OPPO R11 Plus有前後2,000萬像素；vivo X9配前置2,000萬像素柔光拍攝。第二，蘋果從來唔燒錢做鋪天蓋地嘅宣傳，相反，內地手機品牌最鍾意做「洗腦式」宣傳，而且不惜工本，以天價請內地一線明星做代言人，實行粉絲經濟。另外，內地唔同嘅綜藝節目大行其道，手機品牌又燒錢贊助節目，爭取爆光率。清高嘅蘋果都係保持一貫風格，孤芳自賞。最後，亦都係非常重要嘅原因，蘋果iPhone6同iPhone7外型冇重大分別，除咗iPhone7 Plus有雙鏡頭之外。內地人買iPhone係為咗咩？用佢地嘅用語：炫富，即係曬命啦，係身份嘅象徵。如果買咗iPhone7，人哋睇唔出係新機，點解要買？不過如果iPhone8好似市場預期咁有個全屏巨芒，或者可以救返大中華市場疲弱嘅銷售。蘋果喺內地市場不斷被蠶食，係對手變強，加上自己不思進取，查實唔關香港事。市場調查機構Canalys上月發表數據顯示，今年第二季度，蘋果喺中國智能手機市場嘅市佔已跌至第五位，排名分先後前四名係，華為、OPPO、vivo、小米。風吹知
來源:
http://hk.apple.nextmedia.com/financeestate/art/20170804/20110820