湯文亮﹕順按逆按
1 :
GS(14)@2017-06-28 05:45:53【明報專訊】有老友請我食飯，我唔夠膽問佢有什麼事，否則，一定會被佢噴到一面屁，佢會話一定要有事才可以請我食飯？去到酒樓，見到老友兩父子一起到來，我知道今次是會無好會，剛坐落，連茶都未飲，佢就話個仔想用他的安老按揭支持他買新樓，因為聽說有地產商願意為那些俗稱逆按揭的安老按揭與新樓的按揭一併計數，這樣就比較容易批核，並且稱之為逆按揭一條龍。佢個仔仲話，既然從安老按揭每月拿取收入，可以將儲蓄給他作首期，兩父子問我意見，我知道老友個仔剛入大學，唔夠膽畀意見，只能說沒有意見，這餐飯由我請。
「不相信未作犧牲竟先可擁有」
我唔係幾明白，物業市場一片好景，地產商賣樓點解要賣得咁急，他們現在並不是打年輕人主意，而是打他們的父母主意。老實說，我支持父母幫助子女買樓，但首先要子女們供得起，不過現在有很多買樓的年輕人，除了要父母替他們付首期之外，每月供款亦打父母主意，還要動用安老按揭的每月收入替他們供樓，他們如果這樣做，樓價上升還有一線生機，樓價下跌就一鑊熟。有這樣的風險，我真的不夠膽畀意見畀兩父子。
我認為年輕人一定要在社會上有相當歴練，甚至在某程度上作出犧牲，例如要去其他地方工作，有能力有需要才考慮買樓。我突然間想起徐小鳳「順流逆流」，其中有一句歌詞「不相信未作犧牲竟先可擁有」，相當應景。
樓價跌 捱不住
雖然現在大家都話買樓靠父母是新常態，但這限於有能力的父母，要動用儲蓄及安老按揭每月收入來幫助子女買樓是不正常態，在退休之後，已經沒有穩定收入，安老按揭是幫助他們安享晚年，如果拿來畀仔女供樓，唔好話逆流，順流都捱不住；樓價下跌當然唔在講，就算樓價上升，子女亦未必有能力供樓，結果所買的樓宇會被地產商收回。
不過，我認為我的擔心多餘，申請安老按揭的人都希望有一個安定晚年，動用安老按揭收入幫助子女買樓的人應該不會太多。
紀惠集團行政總裁
[湯文亮 敢說亮話]
來源:
http://www.mpfinance.com/fin/dai ... 4613&issue=20170628