📖 ZKIZ Archives

包裝 CEO 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20120501/16296600

老友Ａ到新公司上工，做咗幾個月之後，搵左丁山飲吓下午茶，咦，坐落睇真啲，老友Ａ面色幾好噃，梗係新工做得唔錯，心情愉快嘞。佢去年年初宣佈提早退休， 又話去旅行，又話陪老婆多啲，原來都係公關門面話，實情係提早「過冷河」，無謂在舊公司耗費寶貴光陰。
人地俾你高職厚薪，唔會等你嘅噃，與佢咁老 友，左丁山單刀直入：「喂，新老闆要你交數未，仲有幾耐蜜月期？」老友Ａ笑騎騎：「我讀 MBA時到過跨國顧問公司做暑期工，顧問公司最識得做演述（ presentation），講策略（ strategy），交分析報告連同建議書，我學懂了皮毛再加上多年實戰經驗，得出一條藥方，就係轉新工之後，有三部曲，當然最好最好就係一上工就帶埋成 班客過去，立即交到數，新老闆開顏，但唔係咁理想嘅啫，於是要做（一）交台戲，就係對老闆講，去做公司診斷，搵顧問公司研究吓，唔搵麥肯錫都搵 BCG之類，做台大戲先，拖一拖時間。（二）交橋，向董事會陳述以後營運策略，市場策略，培訓人才策略，節省成本策略等等等，老闆及董事會通過後就要到第 三部嘞，即係交數，如咁搞法，好容易拖到一年，第二年就要交數，醜婦終須見家翁嘅！」
講咁多口水，老友Ａ到達邊一個階段？老友Ａ騎騎笑：「你估個 個老闆都肯用錢請麥肯錫嘅咩，一講之下，老細話我就係麥肯錫，叫我自己做公司診斷，咪照做囉，我有把握嘅，家已經去到第二部曲，交橋，就快開始落實執 行，如無把握，點敢轉工呀？明年應該可以交到數，到時再請你去 Amuse Bouche飲靚酒，食靚嘢！」多謝先，嗰度又真係幾唔錯嘅。老友Ａ縱橫中環多年，係有辦法之人，最緊要係佢對本港市場好熟，人脈關係廣闊，加上一層 MBA術語包裝，寫報告識得加入一啲 BCG、麥肯錫語言，董事會內啲老外尤其受落。《金融時報》一位專欄作家 Lucy Kellaway最討厭呢類猛用 jargon嘅行政人員，不過董事會喜歡就得啦，當 Lucy係異類分子可也。


PermaLink: https://articles.zkiz.com/?id=33269
Next Page
ZKIZ Archives @ 2019