📖 ZKIZ Archives

佔領道路行動何時了？ 南子文

是咁的，南仔覺悟了！

過去幾年政治冷感嘅南仔，周不時被朋友罵可恥，只顧搵錢，不理社會大事。當然南仔信念係堅定的，因為大部份罵南仔嘅朋友，畢業十年都黎，仲未經濟上完全獨立，完成唔係南仔追求嘅人生。

上周末戴生無段段話，佔中行動提早正式開始。南仔仲諗緊，佢地會係中環邊度集會，或者西環邊度集會。點知… 原本係幹諾道中集會，毒果第二朝新聞就係「解放」幹諾道中。之後知道警察用催淚彈嘗試清場，心情非常忐忑，點解第一日就去到咁盡呢？少有地很同情，示威者。

之後就係「遍地開花」行動，即佔領道路行動，先後除咗佔領銅鑼灣、旺角彌敦道同尖沙咀廣東道外，嘗試霸佔上水、元朗同柴灣，後來被擊退。

曾經何時，南仔真係相信和平佔中戴生的話，佔中只係口號，同最終手段，目的就係令其他市民覺悟，出來爭取普選，令政府回應全港市民訴求，無意影響其他人生活。

但係到咗今日，佔中第六日，大部份示威者回到崗位，但少部份仍然係佔領港九主要道路，可能係因為覺得，要覺悟同要理解事件嘅人唔夠，所以南仔文首第一句，南仔覺悟了，請「開放」解放後嘅幹諾道中，比南仔使用。過去六日，你地嘅訴求鋪天蓋地係各大傳媒同社交網路出現，大家知你地想點喇！

要罷工罷課嘅人，點解唔去維園到集會，同政府黎個持久戰，罷佢十年八載反映意見，一定冇市民會罵，或者學外國示威者絕食3天，都可以吸引到社會各界關註，為何偏偏要佔領道路？這樣擾民，最後只會失民心而敗！

希望佔領道路行動早日，和平結束！

下星期講返，唔知仲存唔存在嘅滬港通。

南子文

滬港一定通！ 南子文

滬港通係10月27日宣佈正式誤點，唔少朋友立即話，今次死喇！阿爺真係發火，佔中一日搞唔掂，唔洗諗住通車！不過如果一路有睇南仔文章嘅朋友，會非常唔認同上述說法，因為滬港通嘅最大受益人係內地。

四中全會閉幕，萬字文嘅主題係「依法治國」，對投資者黎講，冇乜啟示。反而國務院陸續公布嘅鐵路、消費推進政策更值得跟進。現今習李政權、與早前胡溫及江朱政權最大不同之處在於夠嚴同鐵腕，將開放發展後嘅中國拉到另一個境界，亦係鄧小平最後欽點嘅繼任人。過去兩年，很多內地官員商人未能適應新玩法，粉粉中招落臺走佬。

去年內地有傳言，尚有以千萬計的罪民，等待著習李政權嘅審批，但一直未成事，相信係用來阻嚇其他人，多於抄家。講真抄家的行政成本也不低，但可以肯定嘅係，內地走錢嘅灰色位已被大大阻塞，要匯大額資金出國，成本比過去任何一個年代也高。

去到這個水平，習李建立功業嘅日子也到，因為內地資本改革嘅先天條件已出現。滬港通係第一步，然後相關官員及機構拿著這個合作方式，到世界各地推銷，就似推銷商鐵一樣。可以預期嘅係，內地盤算嘅係繼續引入全世界資本，但同十年前不同之處係，透過股市及金融市場，而不是早年嘅FDI，未來睇FDI投資中國股票嘅人註定係慢別人一步。

引入世界資本嘅好處係，建立一個更有率嘅金融市場，等內地A股唔會再係創業版當道，股民整係識「打新」，透過外資力量令內地市場成熟起來，係一件十至二十年才能完成的事。在依個大浪裡，內地A股會有很多機會，就似1980年至2000年嘅香港。就算唔炒A股都好，點都要諗下投資A50指數基金，或平保(2318)，這班車走了，不知道何時才有大升之趨勢。