智取大市：爆數效應點煉成
1 :
GS(14)@2017-05-13 01:29:42港股話咁快再破頂，升股逾800隻vs跌股逾600隻，升勢唔算非常全面，無論資金衝科網股好，定係舊經濟股好，都只揀龍頭嚟衝，主板成交只得700億多啲，未夠千億都唔使旨意夠錢掃到雞犬皆升，於是資金最盡只流入部份二線股，三、四線股幾乎冇受惠。每個板塊都係唔龍頭唔買，係近期資金常態。單計科網股，只得寥寥幾隻談得上有基本因素，於是進入兩極化局面；至於傳統板塊，估值偏低殘，基金唔介意一直掃龍頭而唔追落後。過去每次港股升勢末段，未去到單日過千億成交、雞犬皆升都唔會見頂，今次相信冇例外。舜宇（2382）公佈營運數據，主要盈利來源嘅手機鏡頭，4月出貨量4,404萬件，按年勁升1.11倍，按月升9.3%，原本大行預計4月出貨量會按月輕微回落，換言之，又爆數。點解股票行起運上嚟，銷售次次都勝預期？因為唔單止股民，其實佢嘅客戶，都一樣睇住佢個股價、佢盤數。供應商股價係咁升，客仔一定以為佢啲貨好掂，競爭對手都爭住畀訂單佢，所以客戶怕蝕底，羊群效應地送錢畀舜宇使，如是者，舜宇爆數效應相信係咁樣煉成。至於股價？中短線坐7望8字頭。
晉佳
http://www.fb.com/advanceguy1本欄逢周一、三、五刊出
來源:
http://hk.apple.nextmedia.com/financeestate/art/20170510/20016232