搶走陳展鵬網民洗版狂鬧單文柔係豬扒
1 :
GS(14)@2017-03-24 17:08:02「鵬單戀」日前正式曝光，陳展鵬同落選港姐單文柔，俾《蘋果》踢爆山頂摸黑喺車廂食包包，之後陳展鵬接受訪問時，堅稱自己係單身，女方亦只係形象指導，當日約埋揀衫。雖然陳展鵬隱約交代同單文柔只係普通朋友關係，不過男方fans已經咬牙切齒，喺女方Ig瘋狂洗版，鬧爆單文柔耍手段搶走定欣男友。陳展鵬回應完後，話咁快飛咗北京拍劇，以為件事就咁收科？點知前日有周刊登埋兩人攬腰睇傢俬嘅相，斷到正都冇得解釋囉，雖然男方唔喺香港，暫時遠離是非地，不過已有網民鬧爆佢係大話精。至於一夜成名嘅單文柔，其實一直沉默，默默承受各方攻擊，今日佢個Ig就更加群情洶湧，短短時間已經有超過400個留言，幾乎一面倒插爆單文柔有心計、有鋪排，豬扒、姣精，用字之狠絕對嘆為觀止。部份網民留言如下：--趁人唔喺度就媾人哋條仔，識唔識咩叫羞恥o架，有冇家教？--佢哋在粉絲心目中是無人可替代的，你破瓌咗一段好姻緣，你不及定欣好的，放棄啦！死心啦！--都話咗佢有晒鋪排啦，又情侶帽又晒花又打展鵬歌詞出嚟，但你害到定欣，展鵬家人俾記者煩，害到展鵬俾人鬧係大話精，你對得住你屋企人咩？咁心計，成件事得益者只有你一個。--仲以為自己好靚，根本完全比唔上胡定欣。如果唔係你個豬扒，陳展鵬同胡定欣可能已經係一對。--快離開展鵬，免費送上門唔怪得人話你姣婆。--鵬眼前有咁好既女仔（定欣）點會選你呢個落選港姐，看看你自己那麼醜，心地又唔好，你同定欣冇得比，定欣又靚又賢良淑德過你。雖然負評幾乎佔9成，但400條留言中，總會有一、兩條碩果僅存嘅正評嘅！--對你寄予同情，你要頂住呀！好好珍惜當下所擁有的緣份呀！--睇返以前的報道，妳由參選以來都是熱心幫人，又有禮貌！相信妳可以撐住，一切都會過去，有我哋支持你呀！
來源:
http://hk.apple.nextmedia.com/entertainment/art/20170324/19968709