李佳芯收工送上門「長腳蟹」呂慧儀推薦老公拍劇
1 :
GS(14)@2017-02-18 00:51:22圈中女星眾多，又唔係個個釣金龜、個個都拜金，除咗有「不能錯過的女朋友」唐詩詠，圈中都有唔少有情有義嘅好女人，昨日有周刊講起李佳芯同「長腳蟹」呂慧儀!先講「有線幫」過檔去大台嘅李佳芯，上年被爆同ViuTV主持陳炳銓拍拖兼同居，被公司「照肺」後，李佳芯對外堅稱冇男友，更由西貢南圍嘅愛巢，搬咗去清水灣半島，每日收工就車男友返清水灣寓所。據報道指，佢哋上周三先去將軍澳一間酒樓食嘢，由李佳芯去櫃位埋單，跟住陳炳銓揸走咗李佳芯架車過海，留低女友喺商場掃日用品，李佳芯自己坐小巴返去，隔咗兩日，又影到李佳芯拍完《踩過界》外景，收工即搵男友，揸車去南圍接男友，跟住男友買埋宵夜，李佳芯又返轉頭幫男友拎嘢，之後一齊返清水灣寓所，呢啲女友認真唔話得!另一個好女人嘅代表……仲有人妻「長腳蟹」呂慧儀，最近喺大台劇《親親我好媽》做惡妻兼怪獸家長，形象都幾入屋，又有幾多演出機會，反而老公黃文迪，前年開始冇做健身教練，靠老婆長腳蟹幫手，搵佢返大台開工做啲閒角，周刊爆呂慧儀近日為長命劇《愛‧回家之開心速遞》帶埋老公去跟場，又推薦老公畀監製，幫老公打盡關係，幕前幕後嘅飯局都帶埋老公去。
來源:
http://hk.apple.nextmedia.com/entertainment/art/20170217/19931148