李國章整治港大阻力減
1 :
GS(14)@2017-02-05 10:36:34【拆局】港大校長馬斐森突然辭職，令不少政界人士及港大校友大感意外，政界及港大校友普遍相信，港大任命副校長風波，以及校委會主席李國章強硬好鬥作風，才是馬選擇提早離開的原因。有港大校友更直言，原以為特首梁振英不連任，港大「終於可以有番啲好日子」，現在李勢必找一個聽話的人做港大校長，要整治港大將更易，「如果林鄭月娥當選下屆特首，延續梁振英路線，李國章就更有恃無恐，踢走唔鍾意嘅人」。雖然馬斐森聲稱因另有高就所以提早解約，而李國章也否認馬離職與政治或他個人對馬不滿有關。但有港大校友稱，當時仍是校委會成員的李國章，在港大任命副校長風波時，有傳早已對馬斐森「唔聽話」感不滿，又認為馬對學生及反對聲音太軟弱，「到佢（李國章）做埋校委會主席，已經廣泛流傳李認為馬斐森唔適合做校長，想郁走佢」。
梁粉勢選聽話新校長
該校友又稱，李國章的好鬥性格也令馬斐森難以合作，「好似早前佢喺電郵鬧港大教師及職員會主席張星煒『人蠢冇藥醫』，令好多港大教職員不滿，李咁好鬥，馬點同佢合作」，他相信馬斐森在副校風波等事件後，已預計2019年約滿一定不獲續約，再加上不想做李的「打手」，「咁搵到好工梗係早走早着」。另一港大校友兼政界中人相信，現時港大校委會由梁粉主導，與李國章同聲同氣，「由呢班人選新校長，預定會搵個聽話合作嘅人」，到時李國章要整治港大就更加容易，「有個聽話校長配合佢做打手，要搞佢唔鍾意嘅人就更易」，有港大校友更感嘆，原以為梁振英不連任，「港大終於可以有番啲好日子過，點知又要睇實李國章會唔會趁馬辭職，喺呢段時間搞港大、又要睇實新校長遴選，我哋班校友真係冇得唞」。■記者莫劍弦
來源:
http://hk.apple.nextmedia.com/news/art/20170203/19916614