人品好牌品好 梁詠琪：每年都見到自己打牌
1 :
GS(14)@2017-01-31 03:13:31拜年指定台詞當然係恭喜發財！！！年初二就俾黃翠如實現咗喇！！！翠如BB喺大年初二，趁住假期打麻將大發新年財，佢啱啱擺咗張舉晒V嘅相上Instagram同微博，留咗個tag話「#贏咗都唔知咩事」、「#打第三次麻雀」、「#奇怪先生我軍師」咁究竟係咩事呢？睇一睇，嘩！原來翠如BB食出一鋪十三么呀！呢啲奇牌唔係話食就食，要時來運到先食得一次，年初二就有彩運，唔怪之得要影相賀一賀佢啦。據知翠如BB平時唔打牌，佢一開始以為係大爛牌，好彩有男友蕭正楠喺身邊教佢，先食到呢鋪十三么，仲贏咗$64。講到新年打麻將，仲有呢位靚媽－－梁詠琪（GiGi）！事關GiGi喺02年同劉德華拍咗套賀歲片《嚦咕嚦咕新年財》，之後每年都會俾電視台拎出嚟不斷重播，應節嘛！不過咁，原來GiGi一早已經戒咗打牌，佢啱啱就喺facebook話又見到自己：「每年都見到自己係電視打麻將，其實我戒咗打牌好耐啦！」
來源:
http://hk.apple.nextmedia.com/entertainment/art/20170130/19913064