【幕後花絮】星爺戲癮爆發臨場做埋導演教拍攝
1 :
GS(14)@2017-01-19 08:08:02星爺最初聽到扮記者問自己問題條橋，佢都話唔係好明。
周星馳果然魅力非凡，一舉手一投足即令到現場歡天喜地，日前星爺聯同徐克、吳亦凡出席《西遊：伏妖篇》記者會，佢哋接受《蘋果》訪問時仲客串扮記者，上演一場「自己問自己」嘅答問大會，場面極度搞笑！拍攝當日好多幕後花絮，為免讀者、觀眾睇漏星爺等人背後嘅搞鬼場面，我哋決定將訪問過程嘅花絮公開！
越玩越興奮，星爺突發要再問多幾條問題。多謝你呀！
星爺即場發揮導演功力，教我哋點樣走位連戲接shot。
星爺最初聽完我哋講解「扮記者亂入」呢個玩法後，原來都一頭霧水，仲問隔籬位嘅徐克導演：「你明呀？你真係明呀？我唔明喎，死火喇！但係我又唔好意思講我唔明。」做完專訪後，星爺、徐克、吳亦凡齊齊移位扮記者發問，星爺即刻戲癮爆發，飾演記者一角似到十足十，仲問到唔想走。「吓？冇喇？整多一兩條啦，問多兩個吖！」玩得盡興嘅星爺，仲教現場工作人員點樣走位連戲接shot，盡顯導演功架。至於為《美人魚》聲演珊珊的謝依晴（林允粵語配音），當日亦客串幫手扮記者，可惜遇到星爺、徐克同吳亦凡個個搶住發問，根本冇機會舉手。好彩，星爺等人最後都好有風度，畀依晴問到一條問題。
來源:
http://hk.apple.nextmedia.com/entertainment/art/20170119/19901351