📖 ZKIZ Archives

業績簡評 - 永旺 (0984.HK) PARTIPRAL 派得好

http://partipral-hk.blogspot.com/2012/03/0984hk.html




































全年營業額比去年升約1成, 下半年比上半年有進, 主因係內地業務表現繼續進步. 一如上半年中期業績所預示, 中國分部收益貢獻以年度計首次超越大本營香港. 睇唔到分部資產如何, 若然單單從去年既折舊分佈作粗略推算, 內地分店面積應該較香港分店為大, 而比例大概係大陸1間等於香港1.5間左右, 因此, 純以獨立店舖營業額作比較, 內地做得較好算係正常. 不過依家香港同內地既店均收入分野已經係講緊一倍以上, 由此推斷, 以經營效率計內地業務仍然比香港優秀得多.

永旺每期都保持住有一定既"其他收入" 同 "其他支出". 雖然兩者包含左D乜公司一向都無公開, 但今期有6千萬去左呢度, 都要繼續留意將來此數字會唔會出現異動. 毛利率以全年計比去年略有進步. 回顧往績, 毛利率自09年33%見底後已連續第2年回升, 而07,08年平均毛利率係可以達到34.85%, 若然未來毛利率能夠回覆當年水平, 有機會為盈利帶來額外增長動力. 今期租金支出6.62億, 同比上升6.3%, 增幅比營業額慢, 屬利好; 員工成本比去年增加1成, 主因係請多左1千個全職員工, 實際人力成本上漲問題非太嚴重.

扣除特殊收益, 今期純利實際增長約15%. 香港分部表現同去年相若, 故此增長數字實際上全由內地業務貢獻. 現時永旺已經大半隻內地百貨股, 比較值得關心既仍然係內地業務表現. 下半年內地分部利潤有放緩跡象, 估計有部份係受新店開支所影響. 管理層將2012年開店目標由4家大幅提升至10家, 算係頗進取既展望, 仍然值得憧憬.

財政方面仍然相當理想, 雖然淨現金只增加約1.6億, 但其實有3億幾去左新投資物業度. 根據管理層講法, 該物業將於2013年成為集團新總部, 中央配送以及加工設施. 唔算炒樓, 用意應該傾向正面.

2011年每股核心盈利約$1.3, 派息$0.614, 實際派息率47%比過往數年平均略低少許, 但算可以接受. 估值方面, 現價$23即往績P/E 17.7倍, 股息率2.7%. 估值竟然跟我去年初次寫永旺時相若, 以邏輯推論, 現時估值應該傾向合理, 而管理層預期2012年內地分店網絡將會大幅擴張, 故此仍然值得繼續持有, 繼續跟進.

PermaLink: https://articles.zkiz.com/?id=32144
Next Page
ZKIZ Archives @ 2019