太古廣場：年尾保平安旅遊攻略
1 :
GS(14)@2016-12-28 08:11:05每逢年尾幾日假都係home parties大日子，同埋睇人滯留日本機場失禮表演，沒有例外。家姐我成日俾人問外遊點玩先抵，peak season去圍威喂一定唔係我嗰皮先；仲要暴風雪季節去北海道？Well，我完全唔明去東京會驚幅射，但去北海道唔驚暴風雪唔驚delay瞓機場係咩心態囉。以抵玩角度，呢啲地方、呢啲時間，一定超多人超貴超迫，機票酒店唔再講，玩得嚟唔盡興簡直係大忌，人迫人都嬲啦，仲要瞓機場人迫人，有乜為先？當然君不見大部份着晒嘅都係帶埋細路去嘆暴風雪上Geog堂嘅港爸港媽，年尾放假先有時間帶一家大細旅行㗎right？明嘅明嘅。幾日後又新年新開始，early planning係抵玩必修科，家姐教定路2017年年尾闔家旅行保平安攻略：一、好鍾意而又一定要去北海道滑雪的話，可以先參考過去幾年細路校曆表，同公司請定假，學校一開始放假就直飛北海道，一般滑雪場11月尾就開，基本上越近年尾至2月係暴風雪高峯期，早去早享受又安全啲。一早plan定就可以睇實平機票，一家大細就梗係唔坐廉航啦，港航北海道來回都係三千零，有晒飛機餐又坐得舒服，使鬼咁辛苦儲里數搭CX咩，碌DBS Black Card留番嚟免費book北海道酒店啦。二、聖誕既然有假又有錢想去旅行的話，可以去東京大阪呢啲非高危地方，燈飾又靚又可能有雪落，北海道或者北歐呢啲俾雪搞到好甘嘅地方，真係咪搞我，我寧願去泰國避吓寒。嚟緊1月尾又農新年假，咪話家姐唔提你，嗰期都好高危吓。都係嗰句，玩得唔開心就幾平都唔抵啦。【家姐教路】2017年like晒啲航空公司facebook同埋subscribe email alert，年中有咩優惠機票都可以即刻mon到，唔使等人提；另外坐廉航嘅諗清楚係咪真係要開張成行成巿嘅儲milage信用卡，儲得嚟都飛咗幾轉。關家姐
http://fb.com/kwangajei本欄逢周三刊出
來源:
http://hk.apple.nextmedia.com/financeestate/art/20161228/19878532