王菲個唱秒殺內幕 黃牛飛票源來自贊助商？
1 :
GS(14)@2016-12-24 10:55:37喺呢個興「炒嘢」嘅年代，iPhone炒、個唱飛炒、紀念鈔又炒……想買心頭好，第一水就未必有，之不過「你有你張良計，我有我過牆梯」，有時炒唔出，隨時搞到周身「燶」味!!話晒阿菲場上海騷有VR直播，啲門票要炒得起都唔係咁易。天后王菲年底喺上海搞個唱「幻樂一場」，門票喺12月5號開賣，由於大陸官方售票網站「大麥網」開賣即秒殺，黃牛飛不斷喺其他平台湧現，惹阿菲歌迷不滿，主辦媒體受訪嗰陣亦承認，除贊助商同內部認購，公開發售嘅門票僅有800張。大陸媒體人楊樾上周喺個人微博爆料指，王菲演唱會全場8900張票，大麥網僅拎到800張，唔少人猜測主辦單位只係釋出部分位，卻將大部分門票轉賣俾其他平台牟利。另一大陸媒體訪問過主辦單位「白玉蘭文化」董事長莊鳴，對方坦認演唱會贊助商有10幾間，每間都會拎到相約門票，加上「不管是對於王菲還是我們來講，大家都有親朋好友，內部購票的情況也是不可避免的」。至於，網路上出現大量「黃牛」，莊鳴則就話贊助商拎到飛之後，使用權已經歸屬於對方，無論贊助商點處置，譬如送人或再次銷售，主辦單位都干涉唔到，唔通「黃牛飛」票源來自贊助商嘅!?網上見有啲「黃牛飛」將原價7800元人民幣嘅飛炒高幾倍價錢，第一排座位甚至傳出抬高天價約96萬元港幣，由於歌迷唔買帳，導致「黃牛飛」滯銷，啲黃牛黨最後要將門票降至比原價更低嘅價錢，甚至推出買票送贈品等促銷手法嚟賣。
來源:
http://hk.apple.nextmedia.com/entertainment/art/20161224/19875756