破高登負評上限「愛國」唯唯被指擦鞋乞人憎
1 :
GS(14)@2016-12-24 10:55:35梁烈唯份人係點？呢個問題喺高登都有呢個post－「大家點睇梁烈唯，唯唯？？」，先唔講個內容，但呢個post破咗一個紀念，就係最多負皮，唔使一星期負評數字已經超過15,000，而「負皮王」呢個稱號就應運而生。不過高登網民點解unlike梁烈唯？原因有好多，其中梁烈唯喺微博自我簡介入面，曾經寫到：「我係來自中國嘅地球人，我的職業是一個演員，本人很喜歡生活在中國，最喜歡的語言是國語，我為自己身為一個中國人而感到很驕傲！」呢個「愛國」行為令網民反感。而喺去年9月3日，北京抗日紀念大閱兵期間，佢喺微博加入「致敬」港星行列，令網民對佢嘅印象更加惡劣。之後就引申到「負皮王」事件，佢仲因為此事接受訪問，不過佢都依然死撐仲狠批網民「膚淺」o添！除此之外，有網民仲發現佢Instagram有成22萬人follow，不過細心啲睇有唔少追蹤者都係空殼用戶。另外，去年有信用卡公司用梁烈唯嘅硬照做網上宣傳，點知就引發咗公關災難，唔少網民聲稱要剪卡，甚至有網民貼「卡已剪」嘅相，最後信用卡公司將照片由其fb專頁中隱藏，不過都阻止唔到網民繼續去其他post洗版。
來源:
http://hk.apple.nextmedia.com/entertainment/art/20161224/19875759