【馮仁昭四圍超】甘比大女同細仔爭寵
1 :
GS(14)@2016-12-24 10:42:36【又拖又抱】■甘比單手抱細仔，又騰出左手拖實撒嬌嘅大女。
大劉劉鑾雄同甘比拍拖14年，日前低調簽紙結婚，甘比正式升呢為「劉太」。人逢喜事嘅甘比，婚後生活繼續都係照顧一對仔女返學放學，前日冬至下午3點幾，佢就帶埋大女劉秀樺同細仔劉仲學坐住「1LOVEU2」同「1M1SSU」七人車，現身銅鑼灣利園商場，同行仲有甘比媽同保鑣。
【難敵嗲功】■甘比見大女咁嗲，吃力都要抱起佢。
嘆茶粒半鐘
甘比着住Saint Laurent迷彩軍褸襯Hermès手袋，帶眾人去Cova飲下午茶，估計秀樺同仲學已開始放聖誕假，佢哋心情好好，喺商場紮紮跳，令平時拘謹嘅甘比媽都露笑容。眾人嘆足一個半小時先離開。甘比抱住細仔，甘比媽就負責拖住秀樺殿後，但秀樺忽然扭計，追前要拖實媽咪，甘比惟有單手抱囝囝，左手拖實囡囡。喺商場門口等車時，甘比放低仲學，秀樺即雙手攬實媽咪，甘比見佢咁嗲，即彎身抱抱，不過秀樺始終已經8歲，令甘比抱得有啲吃力。秀樺有媽咪抱，都算同細佬爭寵成功，之後再施展嗲功，將頭挨落甘比膊頭，冧爆甘比。等咗10分鐘後，佢哋就坐車離開。撰文：馮仁昭
來源:
http://hk.apple.nextmedia.com/entertainment/art/20161223/19873989