中環在線：張錦成突回巢美聯風暴 李華華
2008-11-11 AppleDaily
美 聯集團（1200）近排上演大股東寶座爭奪戰，有內地資金背景嘅神秘人梁向榮，早排連環出擊，揸住嘅美聯股份增至14.14%，成為大股東，市場一直『目 及』住佢會有咩嘢動作。噚日，美聯前副主席張錦成突然現身美聯中環總部，令人產生無限聯想，究竟張錦成同梁向榮係咪關連人士呢?今次張錦成係咪梁向榮派入 美聯o架呢？華華收到料，第一時間走上美聯總部，搵主席黃建業求證，佢回應話：「呢啲嘢你梗係問番當事人啦！」跟住就不斷帶華華遊花園，點都唔肯回應呢個 傳聞。不過，黃主席咁嘅答案，相信實情係點，大家都心裏有數。
公關：張生做顧問未入局
冇幾耐，美聯公關部終於回應，話張生噚 日第一日返工，出任集團顧問，唔係入董事局，其他就無可奉告。至於一向同傳媒有偈傾嘅張錦成，華華噚日call咗佢成日，都冇覆電話，所以一切疑團都未解 開!張錦成返美聯，相信會對集團內部帶嚟好大衝擊，聽美聯線人講，大家預計稍後仲會有新進展，所以紛紛收口，以免被波及。至於市場點睇，噚日美聯股價逆市 跌3.54%，收報3蚊，睇怕都盡在不言中。
自己檔盈富搵人睇住
張錦成喺05年離開美聯，06年創立盈富物業，今次返娘家美聯，間盈富點打算？原來已經交咗畀另一個股東黎偉強打骰。美聯呢排消息多多，除咗梁向榮狙擊之外，市傳今個月廿號，每區頭目都要交出點樣封蝕本門嘅方案迎戰海嘯。李華華
[email protected]