📖 ZKIZ Archives

加價趕食客 左丁山

2012-02-25  AD

早上行經德己立街，碰到研究 C，問佢去邊，佢話剛剛在威靈頓街一間港式西餐廳吃過早餐，行返公司，乜行咁遠呀，他日入咗 Helena May做會員，吃早餐就夠晒方便啦。研究 C話：「點同呢，石板街一帶有不少食肆，別有風味，同會所唔同。」佢呢朝去嘅餐廳，早餐幾抵喎，三十四元一客，好食夾大件咁講，如果是真的，餐廳豈非晨早 逼爆？研究 C話：「呢，所以我地周圍行就貼近民情嘞，你極少去平民餐廳，有所不知，價格需求彈性好大㗎，幾個月前，呢間餐廳早餐只賣三十元，我去到要企響度等位，後 來提價至三十二元，加兩蚊啫，已變成行入去就有位，家加到三十四元，夥計要等候人客行入嚟，加四蚊，即加價 13%，已經趕晒啲客，可見平民消費習慣好唔同，問你嘞，你知唔知 82，利苑加咗幾多價吖？」
左丁山為之語塞，最近去過兩三次 82呢間三星意大利餐廳，都唔知有冇加到價，總之訂位不易，利苑仲厲害，秘書打去 IFC利苑訂位，得到嘅回覆係：「請你預訂下一個星期嘅枱啦。」在呢啲地方食飯，價錢不是考慮因素，食客嘅價格需求彈性好細。研究 C大喝一聲話：「通脹影響平民最大，猛於虎，有錢人唔怕通脹，因為佢地嘅資產隨住通脹上升而增值。」
唔，研究 C雖然唔係主修經濟學，但在社會打滾多年，開始明白一啲經濟學道理。已故著名經濟學家蔣碩傑教授在 80年代在台灣發表大塊文章，指通脹係「五鬼運財」術，將財富從沒有資產人士轉移往有資產人士，從退休人士轉往炒家，從債權人轉向債仔……結論係：政府經 濟政策一定要打擊、遏抑通脹。
香港因為聯繫匯率神聖不可侵犯，已完全放棄利率政策，失去對抗通脹武器。此外，過往十年，政府完全忽視供應面，攬住 土地不放，導至甲級寫字樓、商舖、豪宅供應嚴重不足，租金不斷上升，加埋輸入食品脹價，本地通脹焉能不升，一月份嘅基本通脹率係 6.7%，係 1996年 4月以來新高。因供應不足而產生結構性通脹之解釋，可細閱林奮強 HK Golden之研究報告，上網就查到，只怕林鄭月娥局長等官員唔肯睇，唔願聽啫。

PermaLink: https://articles.zkiz.com/?id=31513
Next Page
ZKIZ Archives @ 2019