📖 ZKIZ Archives

選舉秘笈 左丁山

2012-2-26  AD

林行止評論特首競選，介紹一本羅馬年代出版嘅選舉秘笈 How to Win An Election，拉丁文與英文對照。左丁山立即去中環三聯書局買書，英文本就冇嘞，中文翻譯本就有，由台灣「立緒文化事業有限公司」出版，作者西塞羅（ Quintus Tullius Cicero），中譯鄧伯宸。作者昆圖斯西塞羅係古羅馬政治家馬可思西塞羅之弟弟，為咗幫阿哥競選做羅馬共和國執政官，寫咗一本選舉小冊子，流傳至今，有 二千零七十六年歷史咯，成書時約莫係中國西漢宣帝年代。
二十一個世紀前，羅馬人選舉，有乜嘢招數吖？左丁山略為翻閱，即刻讀到呀呀聲，原來今天在 歐洲美國，以至今日亞洲，甚至香港舉行嘅選舉，候選人之參選手法與方法，與昆圖斯所言，完全無分別，所謂太陽之下無新事，中國人參選與選舉嘅經驗，與外國 比較，相當微少，有心爭奪公共職位之士，此書應該係聖經，另外一本就係 The Prince（君王論），讀埋三國演義就更有中國權謀特色。
簡單 介紹三幾招：（一）「與其坦率拒絕選民，不如先答應再說」，理由：坦白拒絕減稅，商界選民會氣憤，應承咗先，後來宣稱力有所不逮，做唔到，選民反為冇咁 嬲，曾蔭權對削減利得稅就用呢招。（二）「給承諾以贏得群眾」：派錢派糖實有人鍾意。（三）「時時刻刻把宣傳放在心上」，任何時候不忘宣傳自己。（四） 「不要放過任何抹黑對手的機會」：毫不留情地抖出對手犯罪，色情及貪污的醜聞。（五）不要做出特定的保證：講說話給人民帶來希望，爭取好感，但不要對任何 人作特別保證，要講得模糊。對商界講穩定繁榮，對人民講永遠和他們站在一起，對元老（建制派）講維護傳統。（六）答應任何人任何事，但對自己有利的才履行 承諾。（七）候選人必須是變色龍，見人說人話，見鬼說鬼話，視情況變換表情和言詞。（八）政治充滿了欺騙、背叛與出賣，務必記住，切勿輕易相信別人。還有 不少實用招式，不一一列舉了，睇唐英年之言行及競選操作，佢好似未讀過呢本書。

PermaLink: https://articles.zkiz.com/?id=31512
Next Page
ZKIZ Archives @ 2019