至今見過三次葉童談李中寧 關係疏離
1 :
GS(14)@2016-10-28 06:24:14■葉童表示不知李中寧由英國返了香港。
現年61歲的李中寧是葉童的同父異母哥哥，他由昔日銀河十星到拍三級片，退隱後現擔任保安工作。葉童昨日與陳志雲於北角綵排舞台劇《莎士对比亞》，提到同父異母哥哥李中寧，葉童表示從來不知道他在香港，她說：「關於呢位親人，從來冇接觸，都冇乜見過，我一生人見過佢三次，一次去英國探佢，一次係爸爸過世，另一次係我結婚。」
■李中寧離開娛樂圈多年，身形發福不少，目前任職保安工作。
■葉童指當年結婚，見過李中寧一次。資料圖片
李中寧 資料圖片
■葉童昨日和陳志雲為舞台劇綵排，提到哥哥李中寧，她坦言大家關係疏離。
「命運就係咁」
葉童續謂：「一直以為佢喺英國，唔知佢喺香港，都冇搵過我哋，而我哋電話係冇變過嘅！」她又說：「命運就係咁，命運令我哋唔可以選擇父母同性別，命運令我今日企喺度答你哋問題，我哋係有血緣關係，但比較疏離，見面要睇緣份。」問葉童是否不會主動聯絡這位哥哥？葉童重複指一直不知他在香港。有指李中寧工作的地方跟她綵排位置很近，葉童表示：「香港咁細，如果有緣份一定會重遇同見到面。其實睇到報道，見到佢都好開心，我會好尊重我哋呢種空間，亦都冇必要，佢又唔係跳出嚟話我而家返咗嚟，最重要大家認得佢，關心佢，會尊重佢嘅決定！」李中寧來自一個不愉快家庭，每次受訪都嘆自己孤苦伶仃，又指自己是小丑，在英國留學亦受盡欺凌及剝削。
不愉快家庭
87年做過電子廠貨倉管理員的李中寧，當時月薪得1,800元，承受很大生活壓力，至90年三級片大行其道，他先後與亞姐邱月清、陳寶蓮、秦虹演三級片，處男作《三度誘惑》更錄得千萬票房，他曾透露當時片酬有六位中數。最近返大台拍劇的吳岱融，昨日出席活動時表示沒有跟李中寧合作過，但感到藝人總會有起有跌，自己都沉澱了多年。採訪：張俊銘攝影：陳慧安
來源:
http://hk.apple.nextmedia.com/entertainment/art/20161028/19814240