ZKIZ Archives


「做70年人 未見過香港咁樣」胡官斥梁干預立會難睇 無人信橫洲摸底無紀錄

1 : GS(14)@2016-10-28 06:05:10

■胡國興昨在參選記招上,炮轟梁振英不能照顧香港整體利益。何柏佳攝



【特首跑馬仔】【本報訊】退休法官胡國興昨正式宣佈參選2017年特首選舉,他直言參選因香港太撕裂,矛頭直指特首梁振英,除炮轟梁不能照顧香港整體利益、消除港人怨憤和社會分化外,又斥梁處理立會議員宣誓案,令人覺得行政干預立法,以及梁聲稱橫洲事件摸底無文件紀錄,「邊有人信?」胡表明特首絕不可以抹煞言論自由、人權、法治等核心價值。記者:林俊謙 陳雪玲


胡國興昨舉行記者會前,先向傳媒派發新聞稿,介紹個人資歷時,提到他1970年回港,曾跟從夏佳理做大律師學徒半年,夏與長和集團主席李嘉誠關係密切,記者追問他考慮參選時,有否與李嘉誠及前特首董建華會面,胡均「扮聽唔到」或拒絕回應。對於外界關注胡國興有何班底,他表明選舉時不會公佈,認為一旦當選特首「好的人都會連繫我」,至於政綱仍在「慢慢組織」中,會聆聽不同人士意見,認為未聽意見發表政綱「可能只係廢紙嚟」。雖未有具體政綱,但胡明顯對近年香港撕裂相當不滿,直指梁振英要負責,炮轟梁不能照顧香港整體利益、消除港人怨憤和社會分化,「我做咗70年人,我未見過香港咁樣,因為撕裂乜嘢都做唔到」,指自已對香港現況感無奈,所以決定參選。問到梁以司法覆核試圖推翻立會主席准青政議員再宣誓,胡對梁自任案件原告感「好奇怪」,「特首點解要做原告人之一?我睇唔到有任何理由」,指法律界有「正義要被看到正在執行」的講法,「我唔理你實情係咪行政有干預立法,但最少唔好俾人睇到行政干預立法,你去告佢,係行政首長告立法會首長,唔係好妥,係唔好睇」。


指特首須捍衞核心價值

胡又稱梁不能照顧香港整體利益的例子,「實情咁多,我唔記得咗㖭」,隨即說只拿橫洲事件為例,梁聲稱最關鍵的橫洲摸底報告無文件紀錄,「邊有嘢,有個咁重要決定,冇會議紀錄㗎?」任公職多年的胡稱,「我未見過咁樣,我覺得呢啲嘢佢要解釋囉,好話唔好聽,邊有人信(梁振英說法)㗎?佢講啲咁嘅嘢係好唔妥」。胡認為特首作任何決定前最重要向市民解釋和溝通,捍衞香港核心價值,又指港人注重言論、人權和自由,「做特首唔可以抹煞呢啲嘢」,認為梁任內所作所為未必是按北京指令行事,「可能佢自把自為呢,我唔知道」,又批評梁的「特首地位超然論」,胡指特首地位「冇超然、人人平等」,因香港奉行行政、立法、司法各權分立。中大政治與行政學系高級講師蔡子強認為,大部份港人對梁負面觀感已蓋棺定論,所以胡的批評對梁選情不會有太大影響,但反映香港社會對北京至今未開綠燈讓其他人入閘參選感不耐煩,「如果其他候選人再唔出現,不排除胡官未來兩個月民望會上升,會對其他潛在候選人大打折扣」。




來源: http://hk.apple.nextmedia.com/news/art/20161028/19814847
PermaLink: https://articles.zkiz.com/?id=313748

Next Page

ZKIZ Archives @ 2019