📖 ZKIZ Archives

世間難有伯樂 左丁山

2012-02-16  AD

上星期三晚上，肥仔 K急送電郵去紐約，叫在紐約做網站編輯嘅表妹代買 Lin 17號球衣，表妹立即回郵話：「好似我全部識得在香港嘅朋友都叫我買 Lin球衣，我買得幾多件？」咁又係，聽講已經炒到四十幾元美金一件，三十個朋友話買，表妹就要支付一千三百美元咁滯，佢點肯代咁多朋友預繳呀？肥仔 K等人應送錢過去先啦，集埋幾十張柯打，一次過電滙千五美元去俾表妹，佢先至真係肯出街買衫嘅啫。表妹話自從阿 Lin成為紅星之後，唐人街港式茶餐廳每有轉播紐約 Knicks球賽，一定塞滿人，所有唐人都視阿 Lin為英雄，其實想買到一件 Lin 17現貨球衣都幾難，實在太好賣咯。
到咗星期六，左丁山識得嘅八十後，九十後，只要唔使返工，唔使上學嘅，都搵 now電視睇紐約對 LA湖人，大力大聲為 Lin捧場，高呼 Lincredible，麥迪臣廣場花園內有美國人帶上 Lin面具。一位寂寂無名小子紅得這麼快，真係不可思議，睇數據，佢以正選上陣頭四場，攻入 109分，破咗艾佛遜之四場 101分紀錄，計助攻五次或以上，射入 25分或以上，連續四場如此，對上嗰位新人係勒邦占士。唔怪得賽前俾記者問到：高比拜恩問「 Jeremy Who?」輸波後就話 Lin係一個 great story。著名控 衞拿殊話淨係睇數據： Lin肯定唔係 fluke（符碌），有大把前途。
所 謂天助者自助，林書豪係虔誠基督徒，走紅後話感謝上帝俾機會佢，但如果佢平時到處遭人白眼，睇唔起，每次簽十日合約而感到氣餒，自暴自棄而唔刻苦練波嘅 話，機會到臨之時，教練搵佢出場，佢就會醜態百出，此所以高比拜恩話佢係一個好故事，足以激發小孩子也。前日講起，余伯樂有「未遇伯樂向誰嘶」之句，聽完 林書豪故事，可以咁講，隻馬如果平時懶洋洋，唔操練，就會變成「幸遇伯樂未能嘶！」搵伯樂難，其實做伯樂更難，林書豪申請入讀大學，以 UCLA為首選，因 UCLA學術排名唔曳，籃球排名亦高，出過渣巴、米拿、 Bill Walton呢啲大明星，但 UCLA唔吼，申請入讀中學附近嘅史丹福，史丹福不理睬，卒之「委屈地」入了哈佛，畢業後打 NBA，到處浪蕩，造就了今天的傳奇故事。呢個世界邊處有咁多伯樂吖， God helps those who help themselves。


PermaLink: https://articles.zkiz.com/?id=31340
Next Page
ZKIZ Archives @ 2019