建制派賽後檢討 鄧家彪：「工聯會輸在唔夠狠」
1 :
GS(14)@2016-09-27 07:10:35■鄧家彪每件道具都紀錄着他多年來的政績。黃耀興攝
【本報訊】選舉落敗遭「盟友」揶揄老土，鄧家彪一笑置之，「工聯會老土，我點能夠大力否認？」賽後檢討難免動氣，他認為工聯會參加地區直選，無論面對泛民或建制派，都不夠果斷，「或者難聽啲，叫做唔夠狠」。記者：王家文
贏口碑輸議席，37歲的鄧家彪哭了一場，「話冇喊你都唔信啦」。自喻老土的他挑了村上春樹的《關於跑步，我想說的其實是……》慰藉自己，「個個都話佢應該攞諾貝爾文學獎，但都攞唔到，啱晒feel（感覺）」；他也喜歡跑步，「我喺競選期間都話係領跑嗰個，幾大言不慚，結果係陪跑」。但他說最老土是忽然電髮，以為可吸引師奶票，「老婆鬧我成個老MK，抵你輸」。自嘲過後要自省。由勞工界功能組別轉戰新界東直選，他以為最少奪3萬票，卻以26,931票落敗，較上屆工聯會葉偉明只多2,473票，「輸，無嘢好講，但只係多2千幾票，我覺得好有問題」。選舉前有年輕記者告訴他，父親是工聯會會員，那一票肯定投他；結果票投陳克勤，因民建聯告急。「好多咁嘅情況，要揀佢（選民）硬係唔會覺得你最重要，投票時梗係揀個旗艦店」。同屬建制派，卻似乎天生二奶命，「評價唔係差，但要揀，唔好意思，真係唔輪到你」。敗選檢討，鄧認為工聯會太乖，面對攻擊不會反抹黑，「我哋淨係好乖寫篇文，但邊個睇你嗰900字？」捉到鹿也不懂脫角，如他跟進亞視清盤、加州健身結業等，沒借勢打動選民，「可能就係包裝出問題」。
「選舉應該係互相支持」
他不否認工聯會老土，「掉返轉講，某程度係實而不華」，最棹忌沒人知，「實而不華到人哋唔知係實而不華」。勝選的新民黨容海恩指工聯會未能迎合社會潮流，他感不悅但一笑置之，「社會會講公道話」，但他指選前建制派稱可奪4席，前提是按年初新東補選建制奪15萬票攤分，「去到選舉應該係互相支持，唔會視為敵對，唔係有你冇我」。現實卻是泛民互相扶持，楊岳橋孖張超雄，梁國雄夥陳志全，4人互補一同當選。「你問我有冇嬲？我有嬲我哋面對直選唔夠果斷，或者難聽啲，叫做唔夠狠」。他指盟友既然不肯拖手就要果斷，「我舉個例，喺論壇上唔需要攻擊友好，但我哋亦可以話，佢哋夠票啦，歷史上、紀錄上佢哋夠票，我哋唔夠票，但我哋又冇講呢啲嘢保護自己」。落敗但沒動搖理念，他表明檢討過後會再出發。
來源:
http://hk.apple.nextmedia.com/news/art/20160926/19782276