📖 ZKIZ Archives

商品交易 左丁山

2012-1-31  AD

港交所於新年前宣稱在龍年有意開辦商品交易，有一點兒突如其來，香港已有商品交易所（ Hong Kong Mercantile Exchange簡稱 HKMEX），港交所做乜嘢要搶生意？唔通新交易所好蝦啲？唔係吖，香港商品交易所創辦人兼主席張震遠早已威名遠播，主持市建局，地產商都俾佢震親，兼且 張主席現在係梁振英競選辦公室主任，他日如梁振英當選為特首，大有可能做埋（甲）財政司司長，或（乙）發展局局長，或（丙）商務及經濟發展局局長，或 （丁）財經事務及庫務局局長，如果佢做甲或丁，港交所都俾佢管到正，夏佳理主席（到時應已任滿）及李小加總裁如何面對上頭呀？唔通到時港交所來一招鄧苟克 大撤退呀？抑或到時香港商品交易所與港交所合併，張主席及其他股東「忍痛」以輕微溢價出售商品交易所股權？又或者，唔通港交所下定注碼，博唐生一定當選？
今 年係選舉年，樣樣與政治有關，港交所揀 2012年一月份嚟講商品交易，令人特別敏感。唔講政治因素，純粹講錢，金融Ｌ來電向左丁山拜年，講講嚇就講到金融Ｌ嘅專長，金融買賣投機。金融Ｌ話今年 有一月效應，外有美國上升，內有中國放水傳聞，股市仲有得炒，但參考去年經驗，市場幾時升升埋埋就來一次大跌市，誰也說不準，人在市場，當炒便炒，在刀邊 上討生活，總不能輸打贏要。問佢港交所搞商品交易有無前途，金融Ｌ話：「好難講，香港炒期貨，幾十年來炒唔旺，無內地企業參與做對沖嘅話，始終係成交太淡 靜，吸引唔到本地炒家入市。內地企業做對沖好，炒單邊好，到目前為止，都係在 LME（倫敦金屬交易所）或 CME（芝加哥商品交易所）玩。睇唔到香港點樣可以爭取到大生意。家張震遠檔商品交易所嘅交投靜得可怕，經紀生意甚少，但開大咗個頭，張主席都唔知點收 科。佢當初話搞燃油期貨，在內地交收，但內地唔批准，現在只有黃金交易，但成交額完全唔係金銀業貿易場嗰皮！咁搞法，我地行內人都估緊 HKMEX究竟蝕皮費可以蝕得幾耐？大概因為咁，港交所先至趁機起義啫啩！」咁講法，山東老鄉張震遠果真唔話得，冇法子搞旺自己個場之下，都要為同鄉競 選，好嘢！

PermaLink: https://articles.zkiz.com/?id=30934
Next Page
ZKIZ Archives @ 2019