📖 ZKIZ Archives

精英政治 左丁山

2012-01-30  AD

奧巴馬在國情咨文中為咗尋求競選連任，應承美國人好多好嘢，數吓就有：更多教育支出，更多基建投資，更多綠色能源計劃，更多援助俾負資產業主，更多製造業 稅務優惠──高科技製造業有優惠，貧窮地區製造業有優惠，願意提供工人再培訓嘅製造業有優惠，不外判職位嘅製造業有優惠……提高百萬富翁嘅稅率至最少 30%，加強管制華爾街……直情好似爭取許願樹冠軍，總之在民主直選之下，向最大量選民群眾提供優惠就係買選票嘅最好辦法。奧巴馬以共和黨羅姆尼為假想 敵，碰啱羅姆尼係富豪級，上年收入有二千一百萬美元，交稅率只係 13.9%，正正係 99%平民嘅仇富對象，難怪奧巴馬特登針對佢。
但一啲美國 人認為 2012年總統選舉，不要哈佛對哈佛，希望換吓口味。美國人口中講平民化，實際上精英主義盛行，自學業成績一般，出身非名校嘅列根總統自 1988年退任後，一連幾屆總統，老布殊（耶魯），克林頓（耶魯），小布殊（耶魯、哈佛），奧巴馬（哥倫比亞、哈佛），連續二十四年，美國白宮住客非耶魯 即哈佛校友，而羅姆尼讀過卜翰揚（摩門教大學）、史丹福、哈佛 MBA及 JD，由佢出場，又係不出耶魯哈佛傳統。金里奇呢，佢嘅學校雖然比較上知名度冇咁高（ Emory， Tulane），但有博士學位，做過助理教授，都係學界精英啫，可見得精英主義仍是美國主流，平民與平民大學校友好難打得入白宮。
金里奇嘅女人情 史，十分無情、奸詐，政敵以為可以爆佢內幕，砌死佢，點知在辯論大會上，金里奇反客為主，指斥問問題（污穢情史）嘅 CNN資深記者 John King，大罵佢在正經場合不問政策問題，反而翻舊賬，係代表主流傳媒之八卦陰暗面，竟然得到在場觀眾喝采之聲不絕，令 CNN及 John King面目無光，辯論後金里奇民望大升，在南卡羅連納州初選大勝羅姆尼！金里奇呢一招──大罵傳媒，香港特首參選人可唔可以學呢？值得研究，不過金里奇 拚死無大害，兼且口才潑辣先至掂啫，其他人學佢可能係東施效顰，唔好制！金里奇個人生活與政績都麻麻，但與奧巴馬辯論嘅話，後者肯定好頭痛，情願對着羅姆 尼。

PermaLink: https://articles.zkiz.com/?id=30933
Next Page
ZKIZ Archives @ 2019