2012-01-29 AD
新年在家睇電視直播美國共和黨南卡羅萊納州初選與奧巴馬之國情咨文，深感美國政治人物的口齒好伶俐，個個經過直選洗禮，辯才無礙，在台上你踩我，我踢你， 觀眾睇得過癮。奧巴馬嘅口才，早已享譽，美國總統宣讀國情咨文，相當於我地特首之施政報告再加許願樹，但今年奧巴馬將篇說辭變成連任競選演說第一炮，似已 鎖定共和黨羅姆尼為假想敵，宣佈啲稅務政策幾乎係為打低羅姆尼而設。事實上，現時美國失業率高達 8.5%，歷史上未有一位美國總統在如此高失業率可以連任嘅，好似列根總統係一個例外。奧巴馬在演辭中，不斷提到 jobs（工作職位）及 Jobs（喬布斯），有美國記者統計過，奧巴馬提及 jobs呢個字共三十二次！香港嘅失業率係 3.4%，曾特首威過奧巴馬多多聲啦，曾先生或者可以到白宮教番奧巴馬幾招，如何降低失業率，秘笈就係中國人自由行，奧巴馬或者已聽到風聲，早已宣佈台灣 人可免簽證入境，放寬中國內地人申請簽證安排，但絕口不提香港特區護照可以免簽證入境，可見得在美國政府眼中，港人威威不是威，地位低於台灣與大陸，係中 國人之中嘅第三級別。
最近民意調查顯示，羅姆尼與奧巴馬之間，民望相差三個百分點，屬統計誤差範圍，雙方在大選會殺得難分難解，但與金里奇相比， 奧巴馬可輕易取勝，諷刺的是，共和黨人未必肯選羅姆尼入閘與奧巴馬鬥過，此乃異數。羅姆尼係著名 Mr. Clean（清潔先生），與初戀情人結婚 42年，從無婚外情，子孫滿堂；論學歷，哈佛法學院優異生，哈佛 MBA，仲醒過奧巴馬；論管理，曾任著名私募基金 Bain Capital主管，因而發大達，家財估計有二億美元，曾臨危受命，負責鹽湖城冬季奧運，化危為機，轉虧為盈；論政治，做過麻省州長，大力削赤，將赤字預 算變為盈餘預算。咁嘅紀錄資歷，去邊度搵呀？弊在佢係富二代，父親做過密芝根州州長，而且最弊係摩門教徒，非常虔誠，每年捐二百幾萬美元俾教會，咁就令一 般美國新教徒、基督徒、天主教徒對佢不信任，而且資歷太好，為人謹慎，事事預計周詳，不敢冒險犯錯，咁就俾有兩次婚外情，得罪人唔使本嘅天主教徒金里奇逼 到透不過氣來，未必可以當選共和黨總統候選人咯。