📖 ZKIZ Archives

最緊要勤力 左丁山

2012-01-02  AD

泰國Ａ有于歸之喜，回港邀請香港親戚及同班同學、校友吃 自助餐，講起嚟，原來已經係「巡迴演出」第三餐，十二月中先在紐約州請客，由新郎（康奈爾大學博士，美國人）做主人家，跟住喺十二月二十六日在曼谷由女家 作東，第三餐返到香港，泰國Ａ在港家人出席。泰國Ａ夫婦咪話唔辛苦，不過嫁女咁大件事，辛苦一次又算得乜嘢一回事吖。
泰國Ａ本身又是一個獅子山下 的奮鬥成功故事，佢在香港土生土長，出身公屋基層家庭，自幼家境好一般，生活清苦，人又唔係特別醒目聰明過人，最大優點就係勤奮、交帶、有責任心，係典型 手空空無一物嘅產品。考到入中文大學經濟系，畢業後聽聞洛克菲勒基金有獎學金俾香港學生申請到曼谷法政大學讀碩士，好少香港學生有興趣申請去泰國，佢抱着 試吓唔會執輸嘅心理去申請，點知一擊即中，從此改變一生路向！在曼谷寫碩士論文期間，到朱拉隆功大學圖書館搵資料，認識咗一位朱大女生，初而交談，繼而約 會，跟住談戀愛，後來結埋婚，回港後得師兄指點，入咗香港雷曼，因工作認真投入，上頭交落之東區海底隧道財務可行性工作，佢做到廢寢忘餐，直情在寫字樓投 宿成個月，晚晚通頂。計劃完成後，上頭欣賞佢勤力過人，送佢去紐約參加「新秀訓練班」，第一次全體新人集會，人人報上名來：佐治、耶魯畢業，芝加哥 MBA……彼得……哈佛，史丹福 MBA……諸如此類。輪到泰國Ａ之時，佢大大聲咁講，香港中大，曼谷法政，講完全場愕然，其他人從來冇聽過呢兩間大學，點解雷曼會請到呢條友呢？……
泰 國Ａ就係咁靠勤力搏殺及責任心上位，幾年後因做泰國快速公路項目，受泰國建造/地產公司垂青，因利乘便，與泰國妻子及兩位千金，長居彼邦，兩千金讀曼谷美 國國際學校，成績標青，大女曾拿得英詩創作冠軍，代表學校參加全美中學生英詩比賽，攞到優異獎，入讀 Brown，再跟指導教授到普渡大學讀生態學博士，今次出嫁後，全力寫埋博士論文結論部份，預期八月畢業；次女在 Wake Forest讀醫科已有六年半，一年半後拿得 MD（醫學博士學位），再做 Residence六年就可以成為兒科專家，可以返泰國做醫生，但冇資格返回家鄉香港行醫！


PermaLink: https://articles.zkiz.com/?id=30446
Next Page
ZKIZ Archives @ 2019