ZKIZ Archives


馬場講政治 左丁山

2011-12-27  AD

美聯集團贊助盃賽,上星期六招待大批賓客到賽馬會廂房,裏面人頭湧湧,仲多過國泰港龍在國際大賽日請客,一位 在場人士話,出席者有不少內地買樓豪客,反而地產商代理就比較少數。無他者,地產代理最緊要手上有客,大客要小心照料,地產商有新樓樓盤開就自然會搵代 理,大家唔駛咁多應酬嘅,香港有兩大代理集團之嘛!
一位測量師係戴德梁行嘅行家,做同類型生意,佢又係選委噃,佢話一定會提名 CY,希望 CY能夠入閘,提名係記名嘅,係人都知,而選委投票選特首就係秘密不記名嘅,冇人知。問選委提名 CY之後,佢是否投 CY一票做特首,哈,佢話有大把時間再諗喎,比較吓政綱先啦,測量師要靠地產佬俾生意養大嘅啫。
左丁山在沙圈外就見到另一位測量師,不過係做 QS嘅( Quantity Surveyor),與物業測量師唔同,佢就話:「我地啲 QS行家同 CY唔熟,平時冇偈傾,好彩啫。」佢唔係選委。後來又碰到一位證券界選委,問佢提名及選邊一位,佢死都唔肯表態,一味話要睇兩人嘅政綱,講講吓,佢都承認 此乃托詞,所謂政綱,就係睇吓邊一位會益證券界多一啲!睇落呢個界別嘅選票會幾 open,詹培忠就係大大挺唐派,佢會努力為唐唐箍票,但能否全取 18票?未必一定。

 

最後行返廂房坐低食甜品,有退休警司經過,警司五十五歲退休,佢退休後幾年似乎愈嚟愈精 神,頭髮仲好似多咗噃,唔通退休後冇晒工作壓力,頭髮會自動生番出嚟?退休警司又係唔講馬,要講政治,一開聲就話:「上世紀五六十年代做警察住在荷李活道 宿舍,直情係鐵飯碗,好好嘅嘞,生活無憂,點算係基層?直情係中產啦,我阿爸在九龍倉做咕哩,五十五歲退休,屋企生活靠阿媽做工廠工人支撐,我地住老虎岩 木屋區,後來搬上徙置區,我先至算係真正基層!獅子山下故事多得很,我地有好多人在兒童時代辛苦過梁先生多多聲,你有冇捱過吖?」唉吔,點會冇呀,你估生 出嚟就係馬主咩。呢日講嘢太多,不能專注,加上連場爆冷,卒之輸到眼光光,在馬場講政治邊度有運行吖!

PermaLink: https://articles.zkiz.com/?id=30282

Next Page

ZKIZ Archives @ 2019