ZKIZ Archives


財經評論:跌市買新地樓

1 : GS(14)@2016-04-13 16:59:56

九龍區近期有三個豪宅新盤開售,銷情天與地。三個盤地區都是何文田。市況差賣不到是正常,不正常的是,賣最貴的天鑄2期,價錢比其餘兩個盤貴逾四成,每次即牙膏發售仍熱賣,其餘兩盤卻慘不忍睹。有人話今日買樓預了「狂蝕」,跌市買樓,要揀靚貨,揀發展商品牌,日後跌都冇咁傷。樓市進入回調周期,現有錢身痕出來買豪宅的,均具實力,他們知樓市已經唔得,樓價跌的機會有八成,但基於自住及投資等需要,跌市一樣會買樓。既然已做好坐艇的準備,所以有得揀,一定有要求,一係唔買,買就梗係揀最靚嘅貨,包括地段、用料及發展商品牌。坐艇都坐得豪過人,心甘命抵。仲可以自我安慰話,就算樓價跌,抗跌力都強啲。此外,買得豪宅的人都有一種虛榮心。聽說「新紅雞」(新地,016)興建的樓特別靚,不靠包裝,真材實料,「以心建家」,用料高級,單是送畀你套電器廚具都值200萬元。會所整得豪,招待朋友不知幾威。這種虛榮感,等如你揀部超級跑車,引來唔少艷羨目光。其中一名買家更同我講,「希望買入後不會狂蝕」。我就未住過「新紅雞」樓,但聽公司同事阿雄講,他平時做開驗樓,最害怕就是驗「新紅雞」的樓,因為用料太完美,雞蛋裏挑骨頭都挑唔到囉。「新紅雞」的魔力,唔講得笑。「新紅雞」近期開售的將軍澳新盤,逆市開賣依然排長龍。同事在售樓處訪問買家,問他們為何選擇此盤,葉生就話因為「新紅雞」,覺得發展商OK。首次上車的胡先生也覺得「新紅雞」樓貴少少也是值得。何文田另外兩盤,其實使乜怕,目前地價仲係咁貴,樓花期亦尚有逾20個月,可以慢慢賣。最後補充,本月一手樓市可說是「新紅雞」天下,至今錄得約630宗一手單位成交,「新紅雞」樓佔近490宗,比例超過七成。記者:朱連峰





來源: http://hk.apple.nextmedia.com/financeestate/art/20160413/19568727
PermaLink: https://articles.zkiz.com/?id=299179

Next Page

ZKIZ Archives @ 2019