ZKIZ Archives


【死亡雜誌】由《壹本便利》到《FACE》改名係死因?

1 : GS(14)@2016-03-30 14:42:11

何國輝(左上)話《壹本便利》改名《FACE》就會bye bye。


壹傳媒旗下雜誌《FACE》正式停刊,前身為《壹本便利》,起初跟《壹週刊》同綑發售,至92年獨立成書。《壹本便利》創刊人何國輝(Morris Ho)直言,「當《壹本便利》改名做《FACE》,佢好快就會bye bye!」
Morris講呢番說話,係因為最初與林振強為雜誌命名時,已經為雜誌訂下特色和路向,「中文叫《壹本便利》,英文叫《Easy Finder》,就係畀讀者一個方便,改咗名同普通娛樂雜誌有咩分別!」《壹本便利》最初以分類廣告為主,例如「青雲路」、「搵車快線」等,畀讀者方便搵工搵車,後來變成一本年輕人嘅雜誌。



《壹本便利》出版目的就係畀方便讀者,例如搵工搵車。

後嚟變成年輕人雜誌,以大學生話題為主,例如98年有一期搵豬試食大學飯堂啲飯。

又走性感路線,發掘過舒淇,呢期封面出咗之後,舒淇前經理人文雋就簽佢。



要後生仔肯畀錢買本書,題材就要夠玩味,用語都要貼近年輕人!Morris話最記得有一期講「邊間大學飯堂啲飯最難食?」,搵嚟嘅「食評家」竟然係一隻豬!將各間大學嘅飯盒擺喺地下,任由隻豬自己揀食邊盒,連豬都唔食嘅話,嗰間大學啲飯就最難食!Morris講返都笑住話,「其實好低能,但係又好搞笑,測試結果喺大學界引起好大迴響!」Morris記得黎智英同佢講過,「我唔知你搞緊乜,我睇本本書都睇得明,就係呢本睇唔明。」不過因為銷量越來越好,所以畀《壹本便利》繼續搞。



銷路最好嗰期賣17、18萬本書,係肥彭細女彭雅思做封面。

之後何國輝離開咗《壹本便利》,性感路線都繼續,不過越嚟越激,試過偷拍阿嬌、刊登李蘊性感照,引起社會迴響。



《壹本便利》不但靠玩味,相信大家最記得嘅係一位位封面女郎,當年連舒淇都係由《壹本便利》發掘。Morris話睇到台灣出版嘅舒淇全裸寫真集之後,就聯絡佢台灣經理人搵舒淇做封面,「嗰期出咗街,舒淇前經理人文雋就搵我哋,話想簽舒淇。」而銷路最好嗰期嘅封面主角,係前港督彭定康細女彭雅思做模特兒行catwalk,「嗰期賣咗17、18萬本,係第一次銷路超越《壹週刊》!」Morris話性感係有市場,問題係高品味、玩味定係低俗性感,當中係有分別。《壹本便利》以走性感路線出位,自Morris離開後,仍然以性感為主,不過越玩越激,包括偷拍阿嬌、刊登李蘊性感照等,令《便利》形象負面,最終改名《FACE》。一提改名,Morris就激動,「《便利》形象點樣衰到貼地,都唔會衰過今日要執吓嘛?」佢話改名係大忌,根本洗唔到底,反而捉實《便利》嘅宗旨,今時今日仲可以「食老本」!佢即刻度橋話,「如果畀我做,我會出一個專欄,總括一星期高登有乜嘢得意故仔,我方便你上網睇嘢,都係一種方便嚟o架!」



最終《壹本便利》形象負面要改名《FACE》。

《FACE》開創《FACE Pop》App和網站,希望內容更貼近網上,迎合年輕人,可惜始終不敵網媒間的競爭。



當然,Morris都知道「講就易」,《FACE》社長殷明偉就明白現實有幾難。殷社長認為雜誌要生存唔係咁簡單,「如果你係後生仔嘅話,你都會上高登啦,使乜買本雜誌睇高登?唔通畀啲唔識上網嘅人睇咩?」佢話當年啲人覺得《便利》相對低俗,改名能扭轉廣告客戶對《壹本便利》嘅壞印象,而《FACE》過去一年幾,都好努力嘗試喺網上生存,例如開創《FACE Pop》App和網站,但結果反映並非貼近網上就可以令雜誌生存。每個年代都總有一本喺年輕人心目中最出眾嘅雜誌,90年代有《YES!》、《壹本便利》,呢一代就有《100毛》。或者化身成《FACE》嘅《便利》喺呢個年代結束,正好象徵上一個年代嘅終結;或者現在上網睇資訊,先係真正嘅「便利」。





來源: http://hk.apple.nextmedia.com/entertainment/art/20160330/19549396
死亡 雜誌 壹本 便利 FACE 改名 死因
PermaLink: https://articles.zkiz.com/?id=298761

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019