2011-12-10 AD
「京都議定書」明年到期，加拿大、俄羅斯、日本聲明無意將「議定書」延期，美國更加從來冇簽署，一於懶理。現於南非德班（ Durban）舉行之世界氣候會議，有一百九十一個國家參加，但可以真正影響最後會議結果嘅國家不外乎美國、中國、歐盟、日本、俄羅斯、加拿大等等，其實 簡單啲講就係 G20集團內之國家話事，其他國家只能跟隨。
氣候會議之大議題全球減少排放，常識告訴我們，每個城市之排放大戶就係發電廠與汽車， 發電用煤，排放量較高，用核電，排放反而少，但自日本三一一福島核洩漏事件之後，反核電人士佔上風，所以香港都識得叫電力公司多用天然氣、少用煤，唔敢多 提發展核電。成本方面又點呀，煤價不時上升，但都未夠天然氣價格咁波動， 2010年嘅天然氣價格最低係每公斤 17.4港元（一月），最高係十一月嘅 18.95，今年 2011一至九月之天然氣格價波幅係最低 18.95元（一月），最高 20.73元（五月）， 2011年頭九月平均價比 2010年全年平均價增加咗 11%，又因為本港發電以保持穩定、支持經濟發展為先，幾十年來政府都與兩電簽署利潤保障協議，保證投資回報率，故此兩電因投資天然氣發電而將電費加價， 於法有據。啲議員既然已在議會通過咗利潤保障協議，年年發言反對加價，只係做騷啫，政府唔可以唔尊重法治，唔尊重自己簽署嘅文件㗎嗎？
左丁山最識 慳電，經常熄燈，用冷氣都少過人，盡量唔開，中午出外吃飯，就熄咗寫字樓三分二嘅光管與部份冷氣。我地香港人慣咗不停電，偶一地區停電就將電力公司駡到狗 血淋頭，自己就唔會鬧嘅，有意外咪容忍一陣囉！昔年左丁山做過馬尼拉一間酒店（上市公司）嘅短期總裁，每個月到馬尼拉開會，下午三時左右就全酒店停電，駐 店總經理解釋話係馬尼拉發電量不足，每日分區分時間停電一小時，大家習以為常，左丁山為之苦笑，此等事情若在香港發生，電力公司總裁要到立法會跪低都似。 香港廠商在珠三角開廠者，對拉閘限電更是見怪不怪，電費便宜啲都冇用。電費、發電穩定性、發電減排有好密切相關性，必須保持平衡，唔好天真到以為可以逼使 電力公司（一）減排，（二）維持充足發電量，但又唔准增加電費！