《壹號皇庭》 班底搏老命
1 :
GS(14)@2016-03-16 15:37:412016-03-09 EW
陶大宇、吳啟華、蘇永康和宣萱等是經典劇集《壹號皇庭》系列的舊拍檔，相隔廿年再度聚首，演出「金牌監製」鄧特希的新劇《隱世者們》。
昔日小生變中佬，日前晒冷拍攝煞科戲，在沙塵滾滾的貨櫃場上演連場槍戰追逐戲，雖然拍到一身塵，但愈拍愈起勁，蘇永康逃跑時幾乎仆倒人前，陶大宇更差點被子彈傷眼，神級組合重現，雖然個個年過半百，但都搏到盡。
腰酸背痛
「金牌監製」鄧特希當年一手打造《壹號皇庭》系列，至今仍引人熱話，是次一聲令下，舊班底速速歸隊，眾演員不但「友情價」出演，還出動私伙撐場，動作場面更親身上陣。日前在貨櫃場拍攝槍戰場面，貪靚的蘇永康以私伙靚衫配白鞋上陣，敬業的他更未有錫身，一埋位即與吳啟華在沙地上來回奔跑逃命，跑足十多次，硬食成肚沙塵，其後卻不慎跣倒，幸眼明手快，才不致仆倒人前。眾人見到蘇永康的窘態，都不禁笑作一團，他則苦笑說：「廿年前我哋年輕時，阿希（鄧特希）要我哋拍辦公室戲，估唔到 家接近五張先嚟拍打戲！」至於陶大宇同樣搵命搏，另一場戲講述被宣萱離遠射擊，為求逼真的他，在補拍近鏡時以實彈上陣，彈頭不但對準他面前擦過，打中貨櫃迸出的火花更差點彈中其眼睛，幸好他即時以手擋臉。他還透露早前為開場的混戰大場面，拍足四晚通宵：「開頭拍完打戲即刻腰酸背痛，好彩不嬲鍛鍊開。」
難捨難離
連場打戲雖然辛苦，但老友鬼鬼的他們表示拍得開心，等埋位期間不時圍埋一團打牙骹，吳啟華還特別買來雞蛋仔、水果等小食萬歲，氣氛熱鬧。
劇集預計下月中正式煞科，陶大宇指接拍《隱》劇是因能跟《壹》的演員再合作，故感觸良多，「大家都識咗廿幾年，我同吳啟華係訓練班同學，感情好好，可惜當年在《壹》劇對手戲唔多，今次係第一次正式合作，好開心；同宣萱就係老拍檔，一埋位就可以交到戲。」廿年的友情，比起現時大台小生花旦明爭暗鬥的假情假意，實在難得。
撰文、採訪☆娛樂組 攝影☆何國豪 設計☆吳俊彪