2011-12-1 NM
第九屆《壹週刊》品牌第壹大獎，經讀者一人一票，選出十八個至愛品牌。 第二年於即食時裝界別突圍的H&M，早前與意大利名牌VERSACE合作，推出限量衣飾，掀起搶購熱潮，成為城中熱話。百年老字號位元堂，為革新 不惜改商標，並加強中醫診症服務，為客煲製藥包，迎合年輕顧客群，帶領品牌首次上榜。此外，今年特設創意本地品牌大獎，頒予開業五十五年的美心集團，在第 二代接班人伍偉國帶領下，展開長達十年的改革攻防戰，推出各式各樣的新品牌及餐廳，用創意戰退老化。
美心新舵手 十年抗戰
這天，相約美心集團主席兼董事總經理伍偉國訪問兼影相，他指定要到尖沙咀文化中心地下的Cafe Deli and Wine，而非美心酒樓､快餐或西餅。午飯時間，Cafe坐滿客人，在附近工作的客人余先生這星期已幫襯第三次，「以前呢度係美心快餐，啲位好窄，食得好 急，好少嚟，依家座位闊咗，裝修好有屋企feel。」記者告訴他Cafe也是美心旗下，他即驚訝道﹕「唔怪得啦，我認得收銀個阿姐。」店鋪前身曾是美心快 餐，之後改為咖啡店Starbucks，由於人流較少，生意一般。今年初，改裝成cafe，座位減少，生意額卻急升一倍。 新餐廳刻意與美心「劃清界線」，伍偉國笑言，這是公司的新策略：「同一個焗豬扒飯，快餐賣三十幾蚊，呢度賣五十九元，貴成一倍，但環境唔同咗，呢度賣 life style，客人覺得值得，留下好印象，先知道屬於美心，反而會加分。」
「三把火」燒足十年
今年四十一歲的伍偉國，是集團創辦人伍舜德孫兒。新官上任三把火，伍偉國這「三把火」，燒足十 年。二千年接手公司時，集團以經營中菜、快餐及西餅業務為主，形象傳統､老化，「年輕人唔會行入來，一定要變﹗」早於九八年，他已說服祖父，開設一中一西 兩間餐廳，小試牛刀，包括又一城的「又一棧」。「個位原本想做北京樓，又係紅色金色裝修，唔係唔好，但客人會覺得食咗幾十年都係咁﹗」伍偉國於是組織一個 全新的創意隊伍重新設計，又親自帶領管理層及廚師到外國考察，之後開設西餐廳eating Plus（已結業），「美心旗下嘅高級西餐廳，侍應打煲呔著恤衫，我要新餐廳侍應著黑色T恤，兼可以戴耳環，當時有好多反對聲音，連爺爺都唔係好接受。」 不過，兩間餐廳第一個月已賺錢，「證明我係啱嘅﹗反對派即刻收聲。」伍偉國笑說。 近年，美心陸續推出多間新餐廳，除了Deli and Wine，還有Simply Life、八月花（廣東菜）、白玉蘭（上海菜）等，主要針對二十至四十歲的顧客群。現集團有三分一生意來自新業務，伍偉國坦承，發展太快，要「㩒一㩒」， 其中有員工提議開設時下流行的乳酪店，就被他否決。「Idea幾好，我個仔都鍾意食，但坊間嘅乳酪店分別唔大，五年後仲會唔會流行？入大陸又得唔得？如果 我係細公司就會試，大公司開鋪要好多後勤配合，成本好大，唔值得試。除非有潛質開夠二十間，否則唔會考慮，要先做好品質控制及人力資源的配合。」
狠心換血求變
改革期間，最大難題是人事。「以前公司人事好官僚，好多做咗幾十年嘅員工､主管，習慣接受指令，覺得多 做多錯，一樣嘢幾十年都無問題，點解要改？大學生唔鍾意入來，請十個走九個。」換血無可避免，部門主管更「全部換過」。現負責七個部門的總經理全部外聘， 部分來自麥當勞、星巴克等，有的更以高於市價兩成的人工挖角而來。對於舊主管，則盡量安排調職。伍偉國指自己的管理方法，六成西式四成中式。「如果全西式 管理，唔理做咗幾耐，無用即炒，但中式管理就可以俾機會，調去較適合嘅位置，一定有唔開心，但至少仲有份工。」 為改變守舊的文化，伍偉國要求主管每年提交一年及五年計劃，計算工資､租金及食物成本等。開會時，有問題要呈報，一定要同時提出解決方案。「問題個個都識 講，我要逼佢哋諗埋解決方法，再一齊討論。」伍偉國說。
量力而為 唔熟唔做
伍偉國九二年加入美心前，爺爺伍舜德曾安 排他到文華東方做侍應，又做過運輸工人，學習從員工角度思考。伍舜德○三年過身前，兩爺孫每星期見三次面，既傳授公事，也教做人，「最記得有次一齊搭的士 返屋企，司機收多咗幾蚊，爺爺無出聲照俾。之後我問番佢，佢話唔一定次次要你啱晒，有時唔出聲，但睇到一個人點處事。」美心英文Maxims意思是「格 言」，創辦人亦為後輩留下不少座右銘，伍偉國說最受用是「量力而為」，「爺爺話過，賺錢有無限機會，但有冇能力做到呢？好多人搵美心合作，如去溫哥華發展 飲食，甚至地產項目，但我哋想專注啲，唔熟唔做。」 不過，伍偉國過度「專注」搞新品牌，近日傳統快餐及西餅業務頻頻傳出負面新聞，如疑似面油紙麵包及烏蠅牛肉飯等，伍偉國稱，公司每年風險管理會議都會列出 十大風險項目，食物安全永遠是首位，有關事件已嚴正處理及跟進。
美心○八年推出的天使及魔鬼蛋糕深受歡迎，去年再推出迷你版，對準情侶及小家庭市場。
位元堂 洗老餅形象
賣養陰丸賣到街知巷聞的百年老字號位元堂，花了四年時間重新包裝，去年又和Rejoice（飄柔）合作，大搞中藥洗頭水，打入超市，令品牌入屋。位元堂扭盡六壬洗走「老餅」形象，兩個月前再開設中醫診所御醫坊，為客人診症煲藥，進攻年輕人及OL市場。
位 元堂位於佐敦的樓上中醫診所御醫坊，店內隔着玻璃可望到煲藥機密密煲不停，「我專登做透明玻璃，客人睇到更有信心。」位元堂執行董事鄧梅芬（Karen） 稱，藥包用開水浸熱便可飲用，帶出差都得，「客人睇完症去行街，四十五分鐘返嚟攞藥，加咗呢個服務，多咗OL幫襯。」 創辦於清朝光緒廿三年（一八九七年） 的位元堂，五二年遷來香港，只有三間分店。二千年，上市公司宏安集團以一億二千萬元收購，再交由會計師出身的Karen接手改革。「當時品牌好老土，主要 賣養陰丸，客人都係五十歲長者。」於是，她請來廣告公司為品牌重新包裝，改造商標，又用年輕偶像李克勤重唱由鄭少秋原唱，家喻戶曉的廣告歌﹕「養陰丸，好 似太陽咁溫暖。」 品牌形象外，產品亦要改良，「以前間廠喺油塘工廈，又殘又舊。」Karen憶述，當時藥粉仍然要用人手撈蜜糖黐埋製成丸，分量亦不準確，「設備落後，工人 係老一輩，自然慢吞吞，一增加產量，就趕唔切起貨，銷售部同舊廠員工成日都嗌交。」於是她親自駐廠，引入機器生產線，並聘請有藥劑學歷的人任廠長，以西醫 系統監管品質。
湯包藥包走入屋
上市公司做後盾，改革同時，亦在香港廣開分店，並聘請中醫師駐場，看診、煲藥，售賣白 鳳丸、靈芝孢子，甚至湯包等，吸引年輕客群。高峰期，兩年開分店三十間，卻因過度擴張，令品牌形象走下坡。「平均每兩個月就有一間店開張，有十多間加盟 店，好快發現難於管理，試過叫佢哋送贈品俾客，加盟商竟然收埋唔送。」故特約期滿，Karen將加盟店逐一收回。 現時位元堂有五十多間分店，一半生意額來自內地自由行，尖沙咀等旺區更達七成。為增加國內客信心，國內逾百間分店亦在招牌加上本港上市編號，而產品包裝上 亦配合內地人口味，「內地人通常買嚟送禮，啲蟲草紮成一把扇咁會較有睇頭，香港就會俾人話唔環保。」Karen笑言。
位元堂舊的蝠鼠商標（左），Karen嫌設計老土，○六年改成簡單鮮明的紅太陽標誌（右）。