📖 ZKIZ Archives

馬場不講馬 左丁山

2011-11-23  AD

上星期日馬場有級際賽事舉行，為十二月十一日國泰航空香港國際 大賽之前嘅本港參戰馬嘅檢閱賽，結果賽前一致睇好嘅三隻大熱門馬，分別係千二米「盈綵繽紛」，千六米「雄心威龍」，二千米「加州萬里」，全部敗下陣來，馬 迷（包括左丁山）輸到面青。唔，今年香港馬能否在國際賽揚威，頓生疑問。
因有大賽事，廂房內人頭湧湧，左丁山岳頭岳腦睇電視播沙圈實況之際，俾一 位前輩一手捉住：「喂，搵人幫阿 Henry打氣呀！」左丁山笑住答：「睇跑馬就識少少，睇特首競逐，點有資格幫人攞票呀，我又唔係吳康民。」前輩嘆一聲：「亨利嘅對手好沙塵㗎，我好記得 董生競選連任之時，鄭維健搞挺董大會，我都有去做茄喱啡，點知入到貴賓房，因為早到，房內只有佢喺度，佢竟然問我： What are you doing here？我估唔到佢會咁問，呆咗一呆，之後立即掉頭走人，董生啱啱行入嚟，拍我膊頭，請我返入去，我瞪咗佢一眼，現在都記得。如果佢做咗特首，我怕連禮 賓府條街都唔敢行過去！」
咦，九年前嘅事，前輩仍然記得咁清楚，說之猶有氣未消，唔怪得話要挺亨利，不過佢又唔係選委，唔知點樣去挺。回頭見到退 休大賓架，講起競選，佢話：「我連選委都唔敢去選，怕做咗選委，都唔知投票俾邊個，兩個都咁熟，好難做嘅！」
講政治已經麻煩，參與其事就更加麻 煩，以後五個月冇日得閒，譬如幾乎逢有賽馬都見到嘅 F大姐，呢日廂房內竟然不見芳蹤，後來見到佢位好老公力奇哥哥，問一問，力奇話：「佢話有正經嘢做，唔得閒嚟馬場，叫我自己一個人嚟！」唔係呀嘛，前一個 月見到Ｆ大姐，佢相信話：「星期日我要去馬場，唔得閒同你做嘢嘅噃！」競選呢回事，由開始至投票日，係 24小時工作，全天候準備作戰嘅。Ｆ大姐係公關界前輩名人，二十幾年前在公關界已名震一時，現在從安逸退休生活中走番出嚟，打最後一場公關大戰，咪話唔辛 苦。

PermaLink: https://articles.zkiz.com/?id=29549
Next Page
ZKIZ Archives @ 2019