ZKIZ Archives


梁振英同路人 左丁山

2011-11-22  AD

晚上九時自赤柱廣場坐車返中環,一條雙向兩行車線好繁忙,一架接住一架,如果前面有一架大巴士就會行到蟻躝咁,如果因天雨路滑而有交通意外,後面一定塞 死,呢啲地段只適宜唔駛趕時間嘅富豪紳士居住,打工仔好難搞,早上出門遲啲都會遲到。左丁山搞咗成個鐘頭先至返到屋企,以後難有第二次咯。
次早又 趕去開會,開完大家閒談,總係要講到雙英決鬥,避都避唔開,想來由依家到明年三月底,城中大話題只有一個,就係特首競選,兩位「阿英」講乜都有人報道,有 人分析,有人拆解,譬如振英哥一講咗有時做嘢,未必需要共識,即刻引來不少評論,唔講共識喎,環保團體、保育團體、 80後團體點會肯過你呀?大抵梁營評估今日社會人士開始討厭弱勢政府,追求強人領導,而振英哥就係強人,故此用呢啲說話嚟試吓水溫,不過香港人好奇,一啲 嘢可以做,不可以說,振英哥話唔需要樣樣尋求共識,反而引起新詮釋:梁先生可能比較獨裁。
開會之後,睇完報紙,便去吃午飯,一位飲食業行家在座, 佢話好奇怪失業率會上升到 3.3%,佢個集團請員工不知幾艱難,全職空缺有,兼職空缺大把,所以佢私人覺得失業率點會上升呀?呢啲經濟數據有時幾難解釋,經濟學有所謂「磨擦性失 業」 frictional unemployment,指失業人士與職位錯配,淺白啲就係有工冇人做,有人冇工做,住天水圍嘅唔想去灣仔返工。失業問題好快扯咗去最低工資調整,在座 各位係商界人士,人人反對調高至每小時三十三元,三十五元更加免談,波士N問左丁山意見,左丁山話:「你地唔好彩咯,工會不分左中右,一齊於特首競選期間 發難,會對特首候選人構成巨大壓力,梁振英素來贊成最低工資,相信會一口贊成,以求工聯會民建聯嘅選委投票俾佢,唐英年好可能回應話考慮考慮,要睇數據, 尋求共識。你地估,邊種答案會提高候選人在基層市民中嘅民望呢?」大家聽完為之默然一陣。有報紙講及梁振英與工聯會民建聯「談婚論嫁」,漸有跡象顯示佢地 係同路人,氣味相投,民主派選委如何投票,煞費思量。

PermaLink: https://articles.zkiz.com/?id=29548

Next Page

ZKIZ Archives @ 2019