境隨心轉 江美儀
1 :
GS(14)@2016-02-03 14:29:472016-01-27 EW
江美儀說，她是一個農夫，除了基於愛食飯，也基於自己天生一副賤骨頭。
「我唔係少奶奶命，我真係要耕田，要自給自足㗎！哈哈哈！」
所以，去年二月，她拍完劇集《性在有情》後，因為無綫再沒有給她安排新工作，曾令她感到相當不安。「即係嗰種：咦？我明明係忙到甩晒轆㗎，點解我突然間咁得閒嘅？好唔慣囉！」說時她皺皺眉頭。
沒有劇集在身，她形容這年來，她都很「清閒」，「拍咗幾套電影、去過馬來西亞拍《姊妹淘》、連我最恨拍嘅ICAC（港台劇集《廉政行動2016》）都拍過，又做咗幾個廣告代言，又去過日本兩次、去過北京好多次，仲去過巴黎；又跟豹嫂（胡蓓蔚）個健身教練做運動，跟住就開始排呢套舞台劇《羅生門》囉。」她邊說邊數着手指。
最重要是，無綫這年來仍有出糧給她。「The main point is佢哋嘅人工好低㗎咋！哈哈哈！不過好彩我都有幾個廣告，頂住個雞頭！哈哈！」老老實實，又不是完全沒有工開，又未致於影響收入，那還有甚麼好不安呢？
「都係㗎！好多嘢只係一念之差！我可以覺得咁樣嘅一年幾好呀，有得休息吓；亦都可以覺得，係咪冇人用我呢？但我後尾都諗通咗，唔使做嘢，我白逗緊人工㗎喎！係咪先？所以個人開心唔開心，都係由自己決定囉！睇你自己心態係點咋嘛。」說罷，她又哈哈大笑起來。大情大性得佢呢。
徬徨感
差不多整整一年沒有劇拍，江美儀說，也不知這樣是否叫做「遭雪藏」。
「我都唔知喎，不過就算我係『急凍奇俠』，咁個雪櫃裏面都仲有好多人，I'm not alone！哈哈哈！
「我 家唔夠膽再同外面講，公司（無綫）將會有啲乜嘢畀我做㗎嘞！你睇番啲報道就知，上年我同人講完會開乜嘢劇之後，臨門埋牙先嚟冇我份，但又唔會特別通知我喎，我驚啲人以為我吹水咋，我不嬲都唔係啲造新聞、博見報嘅人呀！」
她坦言，曾因此鑽了牛角尖。「最慘係，佢哋唔係逐少逐少咁減你工作量，而係sharp cut！跟住我就會係咁諗：點解啲人唔搵我呢？點解會冇嘢開嘅呢？我嗰種驚，係因為覺得突然乜嘢都冇晒，個心好耿耿於懷。」
最難頂是，她○七年離開亞視後的那種徬徨感，也一下子湧了出來。「亞視嗰陣本來傾好晒續約嘅條件，點知星期五滿約，星期三先打嚟話所有嘢要由頭傾過，咁即係想點呢？我男朋友（吳君祥）話：『如果你唔簽，你會好嬲；但照簽，你會仲嬲！』咁我就冇簽約，走咗。嗰陣我真係覺得自己好似被遺棄咗咁，我坐過喺屋企，嗰種不安呀、冇安全感呀，真係好難受㗎！」
一餐飯
最後，她找了《名媛望族》的好拍檔劉松仁為她解心結。
「我終於明白，乜嘢叫做『與君一席話，勝讀十年書』！松哥佢話：『呢個時候，你就要學放下！你初初入TVB嗰陣，都唔係套套劇都搵你啦，咁點解 家人哋唔搵你，你要咁唔開心呢？你 家仲多咗個獎（一三年憑《衝上雲霄II》『Head姐』一角獲「最佳女配角」獎）喎！做人嘅嘢，今日有嘅一切，第日都要放低㗎啦，何不瀟灑啲！』
「嘩！佢講完之後，我腦裏面嗰啲『北京霧霾』當堂『sa』一聲散晒！兩、三個鐘咋，佢就搞掂咗我！你話呢餐飯係咪抵請呀！我真係即刻『叮』一聲喎！之前成日係咁問點解、點解，如果我乜都知道點解，我就唔係人，係仙人啦！咁好多嘢既然永遠都唔會有答案嘅，咪由佢囉！」
想通後，江美儀連視野也擴闊了。「TVB唔係我經理人，咁佢哋冇畀劇我拍啫，但係我仲可以拍出面啲電影，拍出面啲廣告，仲可以去埋馬來西亞同新加坡拍嘢㗎！係唔可以去其他電視台拍劇啫，不過香港 家仲有乜嘢電視台啫？係nowTV同有線咋嘛，唔通仲諗亞視咩！」
同學會
雖說她曾經在亞視效力過十年，然而，對於這個電視將於四月一日牌照期滿，成為歷史，卻沒有甚麼不捨得。「全部都係佢哋自己攞嚟嘅！佢哋根本就唔識珍惜佢哋下面做嘢嗰班人！我做嘢，你出糧畀我，天公地道，點解要我問你借番轉頭呢？成件事都好ridiculous！我哋一班『A記同學會』，已經諗住四月一號出嚟聚會，慶祝佢執笠！咁樣一call，應該有成千人出嚟，真係會展先搞得掂呀！哈哈！」
她口中的「A記同學會」，即是現在或曾經在亞視工作過的台前幕後。「我哋好團結，每年都有聚會。有次聚會，有個舊同事嘅老公啱啱過咗身，陳啟泰一句叫大家幫吓佢手，一晚就籌到五萬幾蚊！幾感動呀！」
團結，只因他們也真正體會過從前的「亞視精神」。「我喺裏面做嗰十年，公司資源咁少，我哋冇得唔團結，一唔團結，公司冧檔，大家就冇嘢做，咁我哋咪惟有不斷諗啲新嘢出嚟做，大家堅持做好佢囉！
「其實亞視都有輝煌過呀！至少都有《今日睇真D》、《我和殭屍有個約會》、《情陷夜中環》、《縱橫四海》呀！我 家睇番嗰陣我有份嗰套《義無反顧》，嘩！曾江、葉德嫻、郭藹明、譚耀文、羅家英、鮑姐（鮑起靜），全部電影卡士！好睇到呢！其實好多勁嘅前輩，我喺亞視都合作過晒㗎！」
軟皮蛇
還以為江美儀這年來沒有劇在身，應該會有更多時間跟男友吳君祥享受二人世界，但實情大半年前，男友已開始長駐北京。「佢間中都有返吓嚟嘅。不過咁長時間見唔到面，我哋又OK喎！始終我哋都一齊咗十年，大家都係比較成熟嘅人，好多嘢我哋都明白唔可以改變對方，只可以改變自己嘅立場同睇法。」
然而內地美女多，不擔心嗎？「喂，我覺得呢樣嘢，女人唔應該驚喎，女人應該要話畀佢聽，你有你嘅北方佳麗，我都可以有我嘅香港小鮮肉，呢樣嘢公平㗎喎！」但他前年才被拍到跟已故的潮流教母黎堅惠妹妹黎曉靈（Kimmy）當街拖手喎。「其實我同Kimmy不知幾friend！佢哋如果真係有嘢，都唔會畀你哋影到啦！係咪先？」
有為過這些事鬧交嗎？「咁又冇喎！同埋所謂鬧交，其實好多時都只係我鬧佢啫！哈哈哈！佢係一條軟皮蛇，點嗌交啫？你鬧佢咩？佢會當冇事，笑笑口就過咗去，冇佢符㗎！即係如果我係少林，佢咪詠春囉，點打得成交啫？
「其實兩個人相處，大家知道大家做緊乜咪得囉！一驚，個人就會有負能量！再者，我又唔係依賴佢去生活，嘩！如果我要依賴佢生活，仲要睇佢面色，我寧願唔買Hermes，淨係用H&M呀！所以我唔係少奶奶命，我真係農夫，我要自給自足㗎！哈哈哈！」
二世祖
談到吳君祥，當然也要問問幾時結婚。「呢條問題，問過九萬七千次啦喎！結婚，what's the point？」例如生小朋友囉。「嘩！唔生啦！黐線！我都四張幾（四十四歲），都收經啦！仲生？唔好玩啦！而且我哋 家都已經有個仔啦！」說罷，江美儀跟懷抱中五歲的愛犬Teddy對望。「係呀！講緊你呀！」
然後又說：「對我嚟講，生細蚊仔係個黑洞嚟㗎！我寧願多啲時間照顧佢（Teddy），好過湊小朋友！
「喂！Teddy起碼唔會吸毒、唔會做援交、唔會駁嘴、唔會打機、唔會揸刀斬死我、唔會郁吓就話要吊頸喎！哈哈哈！只不過係二世祖啲啫，未辛苦過、未捱過、未熱過、未凍過，最緊要係佢未餓過！所以佢從來唔會同其他狗爭嘢食㗎，佢會覺得，搶乜啫？我係咪都有得食㗎啦！而且你畀佢食，佢都唔一定食㗎喎！哈哈！二世祖要做乜㗎？只係氹掂個老母同老竇咋嘛！哈哈哈！」
這個時候，只見Teddy一直定睛看着她—正確來說，這種眼神，應該也可以叫做啤。
想知江美儀點講佢嘅「軟皮蛇」男友吳君祥，即掃QR Code上東周網睇片啦！
撰文 周彩霞 攝影 何國豪 鳴謝 新光戲院設計 吳俊彪