ZKIZ Archives


小秘書、大啟發 止凡 Blog

http://cpleung826.blogspot.com/2011/08/blog-post_747.html

今天有點時間, 跟其中一名秘書討論下投資理財, 事源是另外兩位秘書姐姐不停問: 「俾個冧巴黎啦...個市勁跌, 買乜好呀!」無無聊聊又講起股票來。

我又怎會給出一個「冧巴」呢? 講來講去都是理財原則、長線投資、審慎理財、價值投資、買優質股票收息好過放在銀行之類, 如果聽者無心, 我講者一定無意, 試兩句就會「散水」, 不會繼續作更深入討論, 果然一講兩句, 兩名秘書姐姐立即走人, 還說:「我淨係要冧巴渣, 唔洗講咁多concept俾我知, 仲有好多野要做...」, 就只留下一名秘書, 好奇聽我說教。

我又有時間, 聽者又有心, 絕對非常樂意分享, 以下是一些討論內容重點, 以及一些觀察。


首先, 我先舉出最原始的投資回報假設, 讓她先有一些概念
我問:「10萬元好多人都會有, 或者唔難儲到, 係唔係?」 她:「同意」
「咁如果今日放10萬蚊買一隻股票, 年回報有15%, 40年後應該有幾多錢呢?」我問。
她想了想, 更想拿起計算機計, 但拿起之後又不懂如何計, 其實不少人離開了學校就已經忘記怎樣計複利, 我鼓勵她不用計, 這只是一個假設性問題, 只想她感受一下這樣的投資會是怎樣一回事。我不停把這個回報形象化
「想想, 例如$70的匯控一年後要升到$80.5難唔難?」她說「難」
我再問:「咁有隻股票值$1, 一年後要升到$1.15難唔難?」她說「唔難」
我說:「其實呢兩個情況係一樣既, 都係15%年增長, 如果你覺得$1升到$1.15唔難, 就當$1開始慢慢升上去, 諗諗40年後升了多少? 買10萬蚊落去可以變幾多? 估下...」
她估:「400萬啦」
我問:「你覺得400萬多唔多?」
她說:「好多呀, 應該唔會有400萬, 不過見你咁問, 可能有機會掛。」
於是我就計給她看, 應該超過$2600萬。
觀察: 她對投資回報及複利率完全沒有概念。


之後她好像有點懷疑
「升二百幾倍呀? 有無股票得呀?」她問
「今日大部份大藍籌, 包括匯控, 恒生, 長實, 新鴻基, 中電, 港燈...如果70年代買左到而家, 隻隻面價都升超過100倍, 仲未計股息同中途拆股」我答。
「咁勁?!」
「當然, 你又要有眼光買中呢類好股, 當年好多股票今日都已經消失左」我話。
「咁40年之後仲有冇呀?」
「40年前香港發展得, 未來40年中國既發展又得唔得呢? 你可以留意下經濟等數據, 估計一下...」我答。
觀察: 她開始相信長線投資的威力。


投資不一定是指股票, 亦可以是物業, 我跟她討論買樓
一講買樓, 她第一個反應就說:「 而家樓價好貴喎!」
我話:「貴? 點叫貴? 中原指數? 而家幾多?」 
「咁又唔知喎...」
我話:「貴唔貴, 高唔高, 係相對既, 睇你知唔知背後既數字先, 香港樓價用13年時間追返97年個中原指數, 但係要比較既樣都唔同晒, 利率啦, 租金回報啦, 經濟啦, 基建啦, 人均收入啦, 香港人口啦, 供完物業人數啦, 持樓者既實力啦, 大陸既熱錢啦...唔講咁複雜, 其實而家樓按非常低息, 你知唔知幾多呀?」
佢話:「都唔知呀...」
「我又俾你估下, 假設你碌爆卡, 當你欠100萬蚊卡數, 信用卡一般一年收你幾多利息呢?」我問。
「幾萬蚊? 唔知呀, 估下...」
「你覺得幾萬蚊多唔多?」我問。
「好多呀」
「應該大概3x萬左右啦, 即係年利率3x%, 但間間唔同, 咁如果你借100萬蚊供樓, 銀行一年收你幾多利息呢?」我問。
「都要10萬蚊?」
「當而家做到1.8%, 係1萬8千蚊, 多唔多?」我問。
「話...差咁遠?」
觀察: 她對利率完全沒有概念。


之後她好像好有決心在未來3年內儲起10萬元作投資, 但很直接地問我
「咁有左10萬之後, 點知買乜好呀? 買樓又唔識, 買股票又唔知買邊隻...」
「你儲3年錢, 同時你有3年時間學下投資知識, 睇下書, 搵下我呢類人討論下, 3 年喎, degree都讀到個返黎啦, 你唔會諗住有計劃既你3年後同3年前既知識係一樣下嘛?」我問。
「咁又係...」
觀察: 她開始了解自己需要一個投資理財計劃。


還有跟她討論很多題目, 好像有錢人思考方法, 為何現今世代叫苦連天, 如此簡單的方法為何大部份人都做不到, 普遍香港人的消費行為及投資理財意識等。最後我還留點後著, 指出今天說的這些都只是概念性的東西, 到她真的有興趣研究股票及公司年報, 甚至買樓, 利率及經濟分析等, 大家可以討論的東西將會更多, 還有, 我今天講這些都不是讀書學回來的 (我是工程佬一名), 只是平日看課外知識而已, 我能懂, 她都能懂, 我這次討論, 希望可以對她有點啟發。

PermaLink: https://articles.zkiz.com/?id=29273

Next Page

ZKIZ Archives @ 2019