ZKIZ Archives


派報紙讀書 左丁山

2011-11-03  AD

收數 W第二次娶媳,在文華東方酒店康樂廳擺下婚宴,大量財務界人士到賀,包括收數追數界元老 W在內,收數 W話:「元老 W認真俾面,佢收到夠晒籌就退出市場,否則我地係後輩,邊度有得做呀!」元老 W又的確俾面嘅,佢等到九時半後食完碗翅先至告退,出席第二場婚宴,問佢去邊?佢話:「今晚我細妹嫁女呀!」嘩嘩嘩,認真唔話得,俾面收數 W到極!左丁山不久亦告退,是晚係外甥生日,佢爸爸買入大量靚餸,在家煮大餐,叫左丁山去食甜品!
廿一世紀收數乃斯文動作,並非潑紅油、潑火水之 下三濫動作,收數 W等人利用電腦科技,追蹤走數人士,全部電話對話,百分百錄音,以備警方或金管局或銀行財務機構調查,金管局對追數公司一啲都唔客氣㗎,收到投訴就會調 查,若認為公司失職、失言(講粗口之類),就會口頭警告、書面警告,收得幾張「黃牌」,客人(即銀行或財務公司)就會拜拜而去,冇生意做咯!收數 W之生意係與大學同學一同創建嘅,兩位大學畢業生只識揸筆,唔識揸槍,俾人嚇番轉頭似過佢地去嚇人!
收數 W話當年入大學,全憑英文考 A,數學考 A,入到大學上大一英文,早上八時開課,佢永遠係遲到十五分鐘至二十分鐘,老師卒之召佢見面,警告佢經常遲到會肥咗科英文。收數 W解釋:「請你體諒,我朝朝在淺水灣一帶派信俾訂戶,搵學費,唔派報紙就讀不上大學,派完等巴士趕返學,故此成日遲到啫!」好彩英文老師來自美國,見慣學 童派報紙搵學費,乃放佢一馬,而收數 W亦考試得到高分!家佢位大公子在大型美國投資銀行工作,公子(新郎)係 IT新星,可說飲得杯落。
呢晚 有一位港大校友在座,問吓佢關於徐立之自願不續約之事,佢一講就火氣十足,大駡校務委員會與八一八慶典籌辦人,講得激動,賓架 K搭嘴:「你好似有內幕噃?」港大校友話:「怕乜講,我係港大基金成員,捐過錢,知道比你地多㗎!」呢晚係婚宴,無謂多講「校長要有政治觸覺」咁悶嘅事, 請佢講吓名人「課外活動」,大家當堂嘻嘻哈哈!

PermaLink: https://articles.zkiz.com/?id=29160

Next Page

ZKIZ Archives @ 2019