ZKIZ Archives


又使女人錢 劉浩龍問何超儀借100萬

1 : GS(14)@2015-06-11 12:36:51

2015-06-11 NM




上個禮拜,劉浩龍自度好橋,借「污糟論」推介新歌《走》,最終因涉嫌詆毀勞動階層,換來「海量」粗口問候。Plug歌plug出禍,連女友容祖兒亦幫理不幫親:「係魯莽咗!」追掂天后女友後,有指劉浩龍自此飄上雲端目中無人;唯獨對有個賭王老豆的何超儀,「友情」千載不變。據知,半年前何超儀更「義」字當頭,豪借一百萬俾劉浩龍應急。見高拜

早在華星唱片年代,劉浩龍跟何超儀已經相識,「由細玩到大」,劉浩龍對身邊這個有錢朋友,特別落足鞋油。「呢十幾年我哋班朋友都有眼見,師兄(劉浩龍)同Josie(何超儀)friend,但亦特別『擦』,每次成班人出嚟食飯,斟茶夾餸一定,有次Josie唔舒服要食藥,師兄即刻彈起身,仆去攞暖水俾Josie送藥,呢啲嘢,你叫waiter做咪得囉,佢又唔怕核突!」何超儀身邊人說。劉浩龍夠細心,何超儀亦視他為「自己人」,拍板開《全力扣殺2》預對方一角帶挈搵錢,飯局party,何超儀亦一定call埋劉浩龍。「其實我哋明示暗示都試過,叫Josie小心,但佢份人就係咁,咩都講義氣!半年前仲無端端借咗成百萬俾師兄。」知情人說。

一味靠黐

自與億萬天后撻着,短短兩年間,劉浩龍生活水平十級提升,住豪宅、揸靚車兼升呢做老闆,衣食住行都有Joey關照,身嬌肉貴,難怪怕手污糟。

搬上半山

為與女友拉近「距離」,劉浩龍由月租萬八的大坑五百呎「龍屋」,搬到月租三萬六的東半山雲地利道七百呎單位,每月俾多一倍租金,在所不計。

睇平戲泊錶位

陪天后到數碼港拍拖睇戲,師兄慳荷包,嫌時租十五元的停車場貴,改泊八蚊一小時的咪錶位,並選擇在星期二睇特惠場,為Joey製造廉價浪漫。

私有波子

Joey掛有車牌JY616的百萬波子,已成為了劉浩龍的私人座駕,方便男友做柴可夫接送。

換里數坐商務

準備開個唱的Joey要到美國進行操練,唔想分隔兩地,Joey以三十萬分的飛行里數(信用咭消費約二百四十萬元),換取兩套價值十八萬的商務票,「伴遊」劉浩龍一個仙都唔使俾。

注資日本餐廳

劉浩龍進軍飲食業,與范振鋒等好友開日本餐廳,其間有傳餐廳生意唔掂,師兄一度向女友Joey借60萬救亡。

靠女友轉會

為安排劉浩龍過檔太陽娛樂文化,Joey碌盡人情咭,搵中學同學、太陽娛樂股東之一的Alex幫手,將原本三年一百萬轉會費,增至二百萬。

傍到實

早前電影《全力扣殺》票房報捷,女主角兼老闆何超儀搞慶功宴,「債仔」劉浩龍全力傍實,之後傳媒叫何超儀影單人相,全體演員調頭走,唯獨劉浩龍留步化身「助手」,企在旁邊睇到實,細心到出奇。異性貴人多的劉浩龍,除了天后女友容祖兒、富貴何超儀,還有個何韻詩。○七年,正值何韻詩事業高峰期,首奪商台叱咤樂壇女歌手金獎的她,為助老友劉浩龍,除了幫手鋪路由正東唱片跳槽到東亞唱片,甚至自製假緋聞,令對方有更多機會見報。受人恩惠,但劉浩龍卻在何韻詩手中,撬走容祖兒,導致雙方關係決裂。「以前阿詩好撐師兄,當年仲叫埋許安志開聲,帶佢入東亞,總之無論公事私事,阿詩都好幫呢個朋友,點知轉個頭,佢居然走去追祖兒,唔hurt就假。」知情人說。

講義氣

有天后女友光環普照,劉浩龍有靚車揸,旅行搭飛機坐頭等,連轉會到太陽娛樂,亦是容祖兒一手安排,裡裡外外照顧周到。以為事業有個好開始,因為「污糟論」,連累容祖兒躺着也中槍,好在還有講義氣的何超儀撐到底。本週二(六月九日),何超儀離開渣甸山寓所,出發到柴灣工業邨開工,聽到本刊記者追問劉浩龍向她借一百萬,何超儀繼續講義氣:「冇呀!(如果有朋友開聲問你借錢會唔會借?)會,不過我都好想知,如果到我有事,唔知有冇朋友會借錢俾我呢?」

有借冇還

娛樂圈,有唔少義氣仔女,除了何超儀喜歡仗義疏財,仲有古天樂與杜琪峯。

吳卓羲

初入行的吳卓羲,做二打六月薪得八千蚊,「唱K」入不敷支,不時向引薦他入大台的古天樂呻窮,有指兩年間先後向古仔借近五十萬,事業上位後,「唱K」頻頻換車換女,但一個仙都冇還過。

林雪

好賭的林雪,多年來欠下巨額賭債,一手帶他由幕後走到幕前的杜琪峯,曾多次借錢相助並勸他戒賭,可惜林雪愈賭愈狼,借完又借,甚至欠下200萬波數,杜sir最終閂水喉。亦有指甄子丹見林雪避債著草,怕他禍及妻兒,現兜兜借出200萬替他還債,同樣一借無回頭。
PermaLink: https://articles.zkiz.com/?id=290785

Next Page

ZKIZ Archives @ 2019