「想有人陪我環遊世界」唐詩詠愛的呼喚明冧洪永城
1 :
GS(14)@2015-01-30 08:49:23
■唐詩詠前晚出席活動時開到口等人親自表白，睇怕洪永城今次真係一擊即中喎！
多年來唐詩詠一直被崔建邦牽着鼻子走，直至去年拍劇遇上三十一歲旅遊王子洪永城（Tony），二人始互生情愫，唐詩詠那顆寂寞的心再被掀動。最近二人經常約會被傳媒撞破，日前Tony在公開場合更坦白承認對唐詩詠展開追求，大呼對唐有三百個like。據知外表放浪不羈、經常口花花的Tony，今次對三十三歲唐詩詠相當認真，他半年前展開猛烈追求時，已經考慮清楚，之前二人結伴一起看楊千嬅演唱會，更已經是默許雙方的關係。
■洪永城日前公開表示對唐詩詠有好感，令伊人大表驚喜。資料圖片
情人節怕人跟
唐詩詠前晚到九展出席一個頒獎禮，有愛情滋潤的她顯得明艷照人，被問到Tony對她公開示愛，她甜笑說：「係！」開心到暈得一陣陣的唐詩詠，定神後回答說：「係嘅，佢份人同佢啲節目一樣好有驚喜，好有正能量，喺人生最需要正能量時遇到佢係好開心，我希望個正能量繼續落去囉。」唐詩詠又擺明冧爆新歡說：「我都好鍾意陽光男同埋旅行。」不過當問到唐詩詠二人何時開始拍拖，她竟然窒一窒說：「多謝佢一直畀驚喜我，但我仲好需要空間。」仍帶有幾分矜持的唐詩詠表示日前才聽到對方公開示愛，但未收到親口告白，情人節將至，唐詩詠未敢答應Tony約會，她笑說：「嘩，如果我講咗，好多人（記者）等我。」不過她卻不期然漏口風說：「其實都想有個人陪我環遊世界。」Tony似乎已經得米！
郭晉安遭包圍
另外，郭晉安前晚在現場被內地同胞重重包圍，更有同胞強行玩自拍，安仔說：「內地耐唔耐都有失控，如果掹到身上啲乜咪畀你囉，都試過俾人扯甩手錶同太陽眼鏡，其實反而有呢啲場面係開心，因為好熱情，試過有個騷本來唱五首歌，最後一首都冇唱，因為一唱歌個個上台影相。」採訪、攝影：藍文浩
■兩人去年拍劇《載得有情人》暗生情愫。劇照
■郭晉安出席活動時遭內地同胞包圍，但他無投訴更笑言很開心。
來源:
http://hk.apple.nextmedia.com/entertainment/art/20150130/19021635