亞視奇蹟
1 :
GS(14)@2014-09-08 23:15:002014年嘅最搞笑宣傳口號，相信會係「香港不能沒有亞視」。全港市民之中，大概要搵到689個人嚟支持呢句口號亦有一定難度。亞視嘅收視率奇低，主其事者，唔知會唔會面紅。梁振英先生話電視競爭，如有割喉式，最終會對消費者無益，請問這三十五年來，電視行業有過競爭未呀？兩個免費台，一大一細，大的永遠強大，細的永遠縮埋，兩者何曾有過真正競爭？正因為冇競爭，一台獨大，於是節目製作質素日降，玩樂節目要藝員食wasabi，唔係資深大律師嘅教育程度，都睇到眼冤啦。但係亞視又係香港奇蹟，奇在幾個因素：（一）捱打數十年，仍然有人前仆後繼咁去接手經營，香港有咁多生意好做，何故有啲富豪係要接手一盤蝕本生意？（二）現有股東接手後，係咁泵水，億億聲咁揼落一個無底洞，不見有回報希望，究竟佢地是為了甚麼目標／目的？（三）為了續牌，現股東豪言未來會繼續投資27億，嫌錢腥乎？27億元用來買港燈電力投資（2638）一年穩穩陣陣起碼收息六厘以上，而且唔駛做嘢㖭。乜亞視啲股東唔識計機會成本嘅咩？左丁山上MBA財務課程之時，美國教授話：「凡有人投資而不計回報者，除咗做善事之外，必有隱藏性議程（hidden agenda）」，故此左丁山在銀行做貸款，後來做直接投資之時，對所有故作大方，話投資回報唔係咁重要之人，必定查清查楚佢地嘅投資真正動機。世界上有大把慈善機構等住富豪捐款，富翁如果唔捐，而又甘心掉錢落鹹水海，投資於一盤恒久蝕本嘅生意，必有所圖謀，或者係掩眼法，為神秘人士團體服務嘅啫。亞視係香港商業世界一個謎，通訊管理局如果唔知到謎底，做乜要俾佢續牌？且看梁特首會唔會在行會一錘定音，放亞視一馬啦，特首係可以overule通訊管理局與蘇局長㗎，亞視股東可能背後有極龐大資金，聲言繼續投資27億噃，究竟錢從何來，向來諱莫如深，現在趁續牌談判，駛唔駛向公眾交代幾句呀？在香港紡織成衣及傳媒界打拼幾十年嘅肥佬黎搞《蘋果日報》，有往績可稽，居然被左派懷疑、質詢有冇攞美國人啲錢，咁王征盛品儒等等富豪究竟係如何發達嘅呢？佢地在大陸做乜生意呀，左丁山就烏卜卜嘞，政府又係唔係好清楚呢？
來源:
http://hk.apple.nextmedia.com/su ... t/20140908/18858793