林建岳擬辦單車盛事吸旅客 黛安
1 :
GS(14)@2013-04-12 00:28:22http://www.skypost.com.hk/column ... 7%85%E5%AE%A2/88479
黛安噚日與上任十日的旅發局主席林建岳（Peter）食飯，Peter雖然接任新職無耐，但其實佢做咗旅發局成員已經六年，接棒前仲係產品及活動委員會主席，所以好熟悉局方運作。
黛安問新上任的Peter有咩發展大計，佢話睇見七人欖球賽咁成功，希望可以推多啲城中盛事，例如香港可否舉辦全球性單車活動、串連18區景點呢？不過此牽涉封路措施，需要政府配合。提及郵輪碼頭六月落成，佢亦同台灣相關部門傾緊，希望吸引郵輪公司開辦香港、台灣、日本的航綫。
今年旅發局的重頭節目—美酒佳餚巡禮，將由西九海濱移師到政府總部旁草地舉行，Peter形容此乃一大挑戰。以往由西九望向港島，可望見宏偉國際建築群，今年換個角度，由港島回首，未知旅客是否受落。
電影場景帶旺旅遊
近年不少國家以電影拍攝場景作招徠吸引旅客，本身為電影公司老闆的林建岳話，曾有外國旅客話想到電影《無間道》中，劉德華和梁朝偉那幕經典對手戲的天台參觀，可惜天台位於新蒲崗的工業大廈，未能安排。回想起來，黛安記得Peter投資拍的《非誠勿擾》，男主角在北海道小教堂懺悔，教堂後來成為旅遊地標。
現時每名訪港旅客平均花費7000元，Peter的目標是吸引更多過夜旅客，如果每人消費多100元，就對香港經濟有好大幫助。不過近日的「限奶令」及一簽多行等紛擾，令內地旅客對香港有微言，遲下佢會搵特首梁振英傾傾，點樣搞好香港旅遊業。
席間有人問起Peter，特首選舉後商界仲有無梁營同唐營之分，佢笑住咁話，自己怕甜，唔食梁（涼）粉，又唔食唐（糖）粉喎。